ന്യൂഡല്‍ഹി: ഡല്‍ഹിയിലെ വംശഹത്യയുടെ ഉത്തരവാദികളെ കണ്ടെത്താതെ തെറ്റ് ചൂണ്ടിക്കാട്ടുന്നവരെ കേസില്‍ കുടുക്കാനാണ് സര്‍ക്കാര്‍ ശ്രമിക്കുന്നതെന്ന് മുതിര്‍ന്ന അഭിഭാഷന്‍ ദുഷ്യന്ത് ദവെ സുപ്രിംകോടതിയില്‍. ഹര്‍ഷ് മന്ദര്‍ ജുഡിഷ്യറിക്കെതിരേ പ്രസംഗിച്ചുവെന്ന ആരോപണം സുപ്രിംകോടതി പരിഗണിക്കവെയാണ് ദുഷ്യന്ത് ദവെ ഇക്കാര്യം ചൂണ്ടിക്കാട്ടിയത്.
ഡല്‍ഹി കലാപത്തിന് കാരണമായ വിദ്വേഷ പ്രസംഗം നടത്തിയവര്‍ക്കെതിരേ കേസെടുക്കണമെന്നാവശ്യപ്പെട്ട് ഹര്‍ഷ് മന്ദര്‍ ഹരജി സമര്‍പ്പിച്ചതോടെയാണ് ജാമിഅ സര്‍വകലാശാലയില്‍ നടത്തിയ പഴയ പ്രസംഗത്തിന്റെ വിഡിയോയുമായി സോളിസിറ്റര്‍ ജനറല്‍ തുഷാര്‍ മേത്ത സുപ്രിംകോടതിയിലെത്തുകയും നടപടി ആവശ്യപ്പെടുകയും ചെയ്തത്.
മറ്റൊരു വിഡിയോ കൂടി തന്റെ പക്കലുണ്ടെന്ന് ഇന്നലെ കേസ് പരിഗണിക്കവെ തുഷാര്‍ മേത്ത പറഞ്ഞു. എങ്കില്‍ അതുമായി ബന്ധപ്പെട്ട് സത്യവാങ്മൂലം നല്‍കാനും വിഡിയോയുടെ പകര്‍പ്പ് എതിര്‍കക്ഷിക്ക് നല്‍കാനും ചീഫ് ജസ്റ്റിസ് എസ്.എ ബോബ്‌ദെ, ജസ്റ്റിസുമാരായ ബി.ആര്‍ ഗവായ്, സൂര്യകാന്ത് എന്നിവരടങ്ങിയ ബെഞ്ച് നിര്‍ദേശിച്ചു. ഇക്കാര്യങ്ങളില്‍ ഹര്‍ഷ് മന്ദര്‍ മറുപടി സത്യവാങ്മൂലം സമര്‍പ്പിക്കണം. കേസ് ഏപ്രില്‍ 15ന് പരിഗണിക്കാമെന്നും കോടതി പറഞ്ഞു.