യു.എച്ച് സിദ്ദീഖ്
കോട്ടയം: സംസ്ഥാനത്ത് രണ്ടാംവിള നെല്‍കൃഷിയുടെ വിളവെടുപ്പ് ഊര്‍ജിതമാകുമ്പോഴും വിളവ് മോശമാക്കി പാടി ഓഫിസര്‍മാര്‍ കര്‍ഷകരെ പിഴിയുന്നു. രണ്ടാംവിള നെല്‍കൃഷിയില്‍ ഇതുവരെ സംസ്ഥാനത്ത് സംഭരിച്ചത് 58488.356 മെട്രിക് ടണ്‍ നെല്ല്.
വിളവ് മോശമെന്ന പേരില്‍ ഒരു കിന്റല്‍ നെല്ലിന് 11 കിലോ കിഴിവാണ് എടുക്കുന്നത്. മൂന്ന് കിലോ വരെ കിഴിവ് എടുത്തിരുന്നതാണ് ഇപ്പോള്‍ 11ലേക്ക് ഉയര്‍ത്തിയത്. പാടി ഓഫിസര്‍മാരുടെ പിടിച്ചുപറിക്കലിന് പാടശേഖര സമിതികളും കൂട്ടുനില്‍ക്കുകയാണെന്ന് കര്‍ഷകര്‍ ആരോപിക്കുന്നു. വേനല്‍ മഴ ശക്തിപ്രാപിക്കും മുന്‍പായി വിളവെടുപ്പ് പൂര്‍ത്തിയാക്കാന്‍ ലക്ഷ്യമിടുന്ന കര്‍ഷകര്‍ പരാതി നല്‍കാന്‍ തയാറാകാത്തത് ഉദ്യോഗസ്ഥരുടെ കൊയ്ത്തിന് കാരണമായി. കിഴിവായി എടുക്കുന്ന നെല്ലിന്റെ പണം എങ്ങോട്ടു പോകുന്നുവെന്നത് സംബന്ധിച്ചു ആര്‍ക്കും വ്യക്തതയില്ല. ഉദ്യോഗസ്ഥരും മില്ലുടമകളും ചേര്‍ന്നുള്ള ഒത്തുകളിയാണ് ഇതിന് പിന്നിലെന്ന പരാതി ശക്തമാണ്.
രണ്ടാംവിള കൃഷിയില്‍ തൃശൂര്‍, കോട്ടയം, പാലക്കാട്, വയനാട് മലപ്പുറം ജില്ലകളിലാണ് ഏറ്റവും കൂടുതല്‍ നെല്ല് സംഭരണം നടന്നത്.
ഏറ്റവും കുറവ് സംഭരണം പത്തനംതിട്ടയിലും. തൃശൂര്‍ ജില്ലയില്‍ നിന്നും ഇതുവരെ 19086.676 മെട്രിക് ടണ്‍ നെല്ലാണ് സംഭരിച്ചത്. വയനാട് -9930.155, കോട്ടയം -9767.058, പാലക്കാട് -9101.542, മലപ്പുറം -6510.945 മെട്രിക് ടണ്‍ നെല്ലാണ് ഇതുവരെ സംഭരിച്ചത്. പത്തനംതിട്ടയില്‍ 26.133 മെട്രിക് ടണ്‍ മാത്രമാണ് സംഭരണം. ആലപ്പുഴ -2932.116, തിരുവനന്തപുരം -187.081, കൊല്ലം- 47.049, ഇടുക്കി -27.269, കണ്ണൂര്‍ - 132.291, കാസര്‍കോട് -119.122 മെട്രിക് ടണ്‍ ആണ് മറ്റുജില്ലകളില്‍ നിന്നും ശേഖരിച്ച നെല്ലിന്റെ അളവ്. കോഴിക്കോട് ജില്ലയില്‍ നെല്‍സംഭരണം നടന്നിട്ടില്ല. കൂടുതല്‍ മില്ലുകളെ പദ്ധതിയില്‍ ഉള്‍പ്പെടുത്തിയാണ് രണ്ടാം വിള നെല്ല് സംഭരണം വേഗത്തിലാക്കിയത്. കഴിഞ്ഞ വര്‍ഷം 611.26 കോടി രൂപയുടെ 6.93 ലക്ഷം മെട്രിക് ടണ്‍ നെല്ലായിരുന്നു സംഭരണം. ഇതില്‍ 376.88 കോടി രൂപ കര്‍ഷകര്‍ക്ക് പി.ആര്‍.എസ് വായ്പയായും 1.37 കോടി രൂപ നേരിട്ടും നല്‍കി. ഇനി നെല്ല് സംഭരിച്ച വകയില്‍ 233 കോടിയാണ് നെല്‍കര്‍ഷകര്‍ക്ക് സപ്ലൈകോ നല്‍കാനുള്ളത്.