രാജപുരം: പാര്‍ട്ടി കേന്ദ്രത്തിലൂടെ കടന്നുപോകുന്ന പാത വര്‍ഷങ്ങളായി അറ്റകുറ്റപ്പണി നടത്താത്തതിനെതിരേ സി.പി.എം പ്രവര്‍ത്തകര്‍ പ്രതിഷേധവുമായി രംഗത്തിറങ്ങി. കോടോം-ബേളൂര്‍ പഞ്ചായത്തിലെ അട്ടേങ്ങാനം-നായ്ക്കയം പാത നവീകരിക്കാന്‍ പാര്‍ട്ടി നേതൃത്വം സമ്മര്‍ദ്ദം ചെലുത്തുന്നില്ലെന്ന ആക്ഷേപവുമായാണ് അണികള്‍ രംഗത്തിറങ്ങിയത്. സി.പി.എം അനുഭാവികള്‍ ഇതു സംബന്ധിച്ച് സമൂഹമാധ്യമങ്ങളില്‍ ചര്‍ച്ചയാക്കിയിരിക്കുകയാണ്. പാര്‍ട്ടി ഏരിയാ കമ്മിറ്റി നിയന്ത്രണത്തിലുള്ള വാട്‌സ്ആപ് കൂട്ടായ്മകളിലും പ്രശ്‌നം ചൂടേറിയ ചര്‍ച്ചകള്‍ക്ക് വഴിവെച്ചിട്ടുണ്ട്. എട്ട് അംഗങ്ങള്‍ വരാനിരിക്കുന്ന തെരഞ്ഞെടുപ്പ് ബഹിഷ്‌കരിക്കുമെന്നുവരെ മുന്നറിയിപ്പ് നല്‍കിയിട്ടുണ്ട്.
കാഞ്ഞങ്ങാട്-പാണത്തൂര്‍ സംസ്ഥാന പാതയില്‍നിന്ന് ഒടയംചാല്‍ പരപ്പ പാതയിലേക്ക് എളുപ്പം എത്തിച്ചേരാവുന്ന വഴിയാണിത്. വര്‍ഷങ്ങള്‍ക്ക് മുന്‍പ് അറ്റകുറ്റപ്പണി നടത്തിയ പാത ഇപ്പോള്‍ ഗതാഗതത്തിന് യോഗ്യമല്ലാത്ത വിധമായി മാറിയിരിക്കുകയാണ്. വീതി കുറഞ്ഞ് വശങ്ങള്‍ പൊട്ടിപ്പൊളിഞ്ഞതിനാല്‍ വാഹനങ്ങള്‍ക്കു കടന്നുപോകാന്‍ ഏറെ ബുദ്ധിമുട്ടുണ്ടാകുന്നു. പാത നവീകരിക്കാന്‍ കാലാകാലമായി സി.പി.എം ഭരിക്കുന്ന പഞ്ചായത്ത് ഭരണസമിതിക്ക് കഴിയാത്തതിനെതിരേയും അണികള്‍ക്ക് പ്രതിഷേധമുണ്ട്. രണ്ടുപതിറ്റാണ്ടു മുന്‍പ് ബസ് സര്‍വിസ് വരെ നടത്തിയിരുന്ന ഈ പാതയെ തീര്‍ത്തും അവഗണിച്ചിരിക്കുകയാണെന്നാണ് പാര്‍ട്ടി പ്രവര്‍ത്തകര്‍ പറയുന്നത്.