ബെയ്ജിങ്: കൊവിഡ് രോഗത്തിന്റെ തീവ്രമായ അവസ്ഥയില്‍നിന്നു രാജ്യം കരകയറിയെന്നു ചൈനീസ് ആരോഗ്യ കമ്മിഷന്‍ വ്യക്തമാക്കി. എന്നാല്‍, ജാഗ്രതയും നിയന്ത്രണങ്ങളും തുടരുകയാണെന്നും ആരോഗ്യ കമ്മിഷന്‍ വക്താവ് വ്യക്തമാക്കി. കഴിഞ്ഞ ദിവസം ചൈനയില്‍ 11 പുതിയ കേസുകളും 11 മരണങ്ങളുമാണ് റിപ്പോര്‍ട്ട് ചെയ്തിരിക്കുന്നത്. ഇതുവരെ രാജ്യത്ത് 80,793 പേര്‍ക്ക് കൊവിഡ് സ്ഥിരീകരിച്ചിട്ടുണ്ട്. രോഗം ബാധിച്ച് 3,169 പേരാണ് മരിച്ചത്. രോഗം ബാധിച്ചവരില്‍ 62,793 പേരും സുഖം പ്രാപിച്ച് ആശുപത്രി വിട്ടെന്നും ചൈനീസ് അധികൃതര്‍ വ്യക്തമാക്കി.
ചൈനയില്‍ ഭീതി ഏകദേശം ഒഴിയുമ്പോള്‍ യൂറോപ്പും അമേരിക്കയും കൊവിഡ് ഭീതിയിലേക്കു ഞെരങ്ങുകയാണ്. അമേരിക്കയില്‍ ഗതാഗത നിയന്ത്രണമടക്കം ഏര്‍പ്പെടുത്തിയതിനു പുറമേ, വിമാനയാത്രകള്‍ക്കും വിദേശയാത്രകള്‍ക്കും നിയന്ത്രണമുണ്ട്. കടകളും മാര്‍ക്കറ്റുകളും അടച്ചിട്ടിരിക്കുകയാണ്. കാലിഫോര്‍ണിയയിലും അടിയന്തരവാസ്ഥ പ്രഖ്യാപിച്ചിരിക്കുകയാണ്.
ഇറ്റലി, ജര്‍മനി അടക്കമുള്ള യൂറോപ്യന്‍ രാജ്യങ്ങളിലും അതീവ ഗുരുതരാവസ്ഥ തുടരുകയാണ്. ഇവിടങ്ങളിലെ നിയന്ത്രണങ്ങള്‍ നീക്കിയിട്ടില്ലെന്നു മാത്രമല്ല, പുതിയ കേസുകളും മരണങ്ങളും റിപ്പോര്‍ട്ട് ചെയ്യുന്നുമുണ്ട്. സ്‌പെയിനില്‍സ കൊവിഡ് കാരണം ലാലിഗ മത്സരങ്ങള്‍ നിര്‍ത്തിവച്ചിരിക്കുകയാണ്.

ഇറാനില്‍ മരണം 429

ഇറാനില്‍ കൊവിഡ് ബാധിച്ച് മരിച്ചവരുടെ എണ്ണം 429 ആയി. ഇന്നലെ മാത്രം 75 പേരാണ് ഇറാനില്‍ രോഗം ബാധിച്ച് മരിച്ചത്. ഇന്നലെ മാത്രം 1,075 പേര്‍ക്ക് രോഗം സ്ഥിരീകരിച്ചു. രാജ്യത്തു പതിനായിരത്തിലേറെ പേര്‍ക്ക് രോഗം സ്ഥിരീകരിച്ചിട്ടുണ്ട്. പ്രതിസന്ധിയെ തുടര്‍ന്ന് ഐ.എം.എഫിനോട് ഇറാന്‍ അഞ്ചു ബില്യന്‍ ഡോളറിന്റെ സഹായം തേടിയിട്ടുണ്ട്. ഓസ്ട്രിയയിലും ഇന്നലെ ഒരാള്‍ മരിച്ചു. കൊവിഡ് ബാധിച്ച് രാജ്യത്തെ ആദ്യ മരണമാണിത്. ഓസ്ട്രിയയില്‍ 302 പേര്‍ക്കാണ് രോഗം സ്ഥിരീകരിച്ചിരിക്കുന്നത്.
സിംഗപ്പൂരിലും മലേഷ്യയിലും ജാഗ്രത പ്രഖ്യാപിച്ചിട്ടുണ്ട്. ഇവിടങ്ങളില്‍ ആളുകള്‍ കൂടിയ പരിപാടികളില്‍ പങ്കെടുത്തവരെല്ലാം നിരീക്ഷണത്തിലാണ്.തായ്‌ലാന്‍ഡില്‍ 11 പുതിയ കേസുകള്‍ റിപ്പോര്‍ട്ട് ചെയ്തു. ഇതോടെ ഇവിടെ രോഗം സ്ഥിരീകരിച്ചവരുടെ എണ്ണം എഴുപതായി. ദക്ഷിണാഫ്രിക്കയില്‍ വ്യാപകമായി വൈറസ് ബാധ സ്ഥിരീകരിച്ചതോടെ രാജ്യം അതീവ ജാഗ്രതയിലാണ്. ഇവിടെ 114 പേര്‍ക്കാണ് പുതിയതായി രോഗം സ്ഥിരീകരിച്ചത്. ഇന്നലെ ആറുപേര്‍കൂടി മരിച്ചതോടെ മരണസംഖ്യ 66 ആയി. 7,869 പേര്‍ക്കാണ് രോഗം സ്ഥിരീകരിച്ചിരിക്കുന്നത്.

കൂടുതല്‍ രാജ്യങ്ങളില്‍ മരണം

പോളണ്ടില്‍ ഇന്നലെ ആദ്യ കൊവിഡ് മരണം റിപ്പോര്‍ട്ട് ചെയ്തു. ഇവിടെ 47 പേര്‍ക്കാണ് രോഗം സ്ഥിരീകരിച്ചിരിക്കുന്നത്. അള്‍ജീരിയയിലും ഇന്നലെ ആദ്യ മരണം റിപ്പോര്‍ട്ട് ചെയ്തു. ഇവിടെ 24 പേര്‍ക്കാണ് രോഗം സ്ഥിരീകരിച്ചിരിക്കുന്നത്. ഗ്രീസിലും ഇന്നലെ ആദ്യ മരണം റിപ്പോര്‍ട്ട് ചെയ്തു. ദക്ഷിണാഫ്രിക്കയിലും ഇന്നലെ ആദ്യ കൊവിഡ് കേസ് റിപ്പോര്‍ട്ട് ചെയ്തു.

സ്‌പെയിനില്‍ മന്ത്രിക്ക് വൈറസ്
സ്‌പെയിനിലെ മന്ത്രി ഐറിന്‍ മോണ്‍ടെറോയ്ക്ക് കൊവിഡ് സ്ഥിരീകരിച്ചു. സ്‌പെയിന്‍ ഡെപ്യൂട്ടി പ്രധാനമന്ത്രി പാബ്ലോ ഇഗ്ലെസിയാസ് നിരീക്ഷണത്തിലാണ്. കഴിഞ്ഞ ദിവസം ബ്രിട്ടീഷ് മന്ത്രിക്ക് കൊവിഡ് സ്ഥിരീകരിച്ചിരുന്നു. ഇറാനിലടക്കം നേരത്തേതന്നെ ഭരണതലത്തിലെ പ്രമുഖര്‍ക്കു രോഗം സ്ഥിരീകരിച്ചിരുന്നു. സ്‌പെയിനില്‍ മാഡ്രിഡ് നഗരം അടച്ചിടുമെന്നാണ് സൂചന.

ഉത്തരകൊറിയയില്‍നിന്ന്
വിവരങ്ങളില്ല!

സിയോള്‍: കൊവിഡ് ഭീതി ലോകത്താകമാനം പടരുമ്പോള്‍ ഉത്തര കൊറിയയില്‍നിന്നുള്ള വിവരങ്ങള്‍ ലഭ്യമല്ല. ദക്ഷിണ കൊറിയയടക്കമുള്ള അയല്‍ രാജ്യങ്ങളില്‍ രോഗം പടര്‍ന്നുപിടിക്കുമ്പോഴും വിഷയ്തതില്‍ ഉത്തരകൊറിയയില്‍നിന്ന്അറിയിപ്പുകളൊന്നുമുണ്ടായിട്ടില്ല.അതേസമയം, ഉത്തരകൊറിയയില്‍ കൊവിഡ് ബാധിച്ചവരെ ഭരണാധികാരിയായ കിം ജോങ് ഉന്നിന്റെ നിര്‍ദേശപ്രകാരം വെടിവച്ച് കൊന്നെന്ന റിപ്പോര്‍ട്ടുകളും പുറത്തുവരുന്നുണ്ട്.