കൊച്ചി: സംസ്ഥാന സര്‍ക്കാരിനെയും പ്രതിപക്ഷത്തെയും രൂക്ഷമായി വിമര്‍ശിച്ച് കേരള കത്തോലിക്ക മെത്രാന്‍ സമിതി മദ്യവിരുദ്ധ കമ്മിഷന്‍. മദ്യവിരുദ്ധ ഞായര്‍ ആചരണത്തിന്റെ ഭാഗമായി ഈ മാസം 10ന് പള്ളികളില്‍ വായിക്കാന്‍ പുറപ്പെടുവിച്ചിരിക്കുന്ന സര്‍ക്കുലറിലാണ് വിമര്‍ശനം ഉന്നയിച്ചിരിക്കുന്നത്. സര്‍ക്കാര്‍ മദ്യനിരോധനം നടപ്പാക്കണം. എന്നാല്‍ മദ്യലഭ്യത കുറച്ചുകൊണ്ടുവരാനുള്ള നിലപാടുകളല്ല സംസ്ഥാന സര്‍ക്കാര്‍ സ്വീകരിക്കുന്നതെന്നും കമ്മിഷന്‍ കുറ്റപ്പെടുത്തുന്നു.

മദ്യത്തിന്റെ ലഭ്യതയും ഉപഭോഗവും കുറച്ചുകൊണ്ടുവരാനുള്ള നയത്തിനായിരിക്കും മുന്‍ഗണനയെന്നാണ് പ്രകടനപത്രികയില്‍ വാഗ്ദാനം ചെയ്തിരുന്നത്. ഇത് പാലിക്കാന്‍ സര്‍ക്കാര്‍ തയാറാകണം. പതിനായിരത്തിനു മുകളില്‍ ജനസംഖ്യയുള്ള പഞ്ചായത്തുകളെ നഗരസ്വഭാവമുള്ളതായി കണക്കാക്കി മദ്യശാല തുടങ്ങാന്‍ അനുമതി നല്‍കിയത് പ്രകടന പത്രികക്കുതന്നെ എതിരാണ്. മദ്യത്തിന്റെ വിഷയത്തില്‍ ജനങ്ങളോടുള്ള പ്രതിബദ്ധത നിറവേറ്റുന്നതില്‍ പ്രതിപക്ഷത്തിന്റെ പങ്കും പരിശോധിക്കപ്പെടേണ്ടതാണ്. പ്രതിപക്ഷം എതിര്‍ത്തത് ബ്രൂവറികള്‍ക്ക് അനുമതി നല്‍കിയ സര്‍ക്കാരിന്റെ നടപടിക്രമങ്ങളിലെ വീഴ്ച മാത്രമാണെന്നും സര്‍ക്കുലറില്‍ വിമര്‍ശിക്കുന്നു.

യുവതലമുറ മയക്കുമരുന്നിലേക്ക് നീങ്ങുന്നത് ഗുരുതരമാണ്. ശക്തമായ നിയമസംവിധാനത്തിലൂടെ ഇതിനെതിരേ നടപടി സ്വീകരിക്കണം. അഴിമതി, മാലിന്യ മുക്ത കേരളമെന്ന പോലെ മദ്യവിമുക്ത കേരളവും നവകേരള നിര്‍മാണത്തിന്റെ ഭാഗമാകണമെന്നും ബിഷപ്പുമാരായ മാര്‍ റെമജിയൂസ് ഇഞ്ചനാനിയില്‍, ജോഷ്വാ മാര്‍ ഇഗ്‌നാത്തിയോസ്, ആര്‍. ക്രിസ്തുദാസ് എന്നിവര്‍ സംയുക്തമായി ഇറക്കിയ സര്‍ക്കുലറില്‍ ആവശ്യപ്പെടുന്നു.