കോഴിക്കോട് : സംസ്ഥാനത്ത് കോവിഡ് - 19 വ്യാപകമായ സാഹചര്യത്തില്‍ ആരോഗ്യ വകുപ്പുമായി സഹകരിച്ച് എസ്.കെ.എസ്.എസ്.എഫ് പ്രവര്‍ത്തകരും വിഖായ സന്നദ്ധ വിഭാഗവും പ്രതിരോധ പ്രവര്‍ത്തനത്തിനിറങ്ങുന്നു. പൊതു സ്ഥലങ്ങളില്‍ കൈ കഴുകല്‍ ഉള്‍പ്പടെയുള്ള ശുചീകരണത്തിന് സൗകര്യമൊരുക്കുക, പൊതുജനങ്ങള്‍ക്കായുള്ള നിര്‍ദേശങ്ങള്‍ സാമൂഹ്യ മാധ്യമങ്ങള്‍ മുഖേനയും വാഹനങ്ങളില്‍ പ്രത്യേകം അനൗണ്‍സ്‌മെന്റ് നടത്തിയും പ്രചരിപ്പിക്കുക, ആശുപത്രികളിലെ ബ്ലഡ് ബാങ്കുകള്‍ക്ക് സംഘടനാ പ്രവര്‍ത്തകര്‍ മുഖേന രക്തദാനം നടത്തുക, വിദേശത്ത് നിന്നും നാട്ടിലെത്തിയവരെ ആരോഗ്യ വകുപ്പു കണ്‍ട്രോള്‍ റൂമുമായി ബന്ധപ്പെടുത്തുക തുടങ്ങിയവയ്ക്ക് സംഘടന രംഗത്തിറങ്ങും.
മാസ്‌കുകള്‍, ടവലുകള്‍, ഹാന്റ് വാഷ് ലിക്വിഡ് തുടങ്ങിയവ വിതരണം ചെയ്യുന്നതിനും സംവിധാനം ഏര്‍പ്പെടുത്തുമെന്നും വിവിധ ഘടകങ്ങളിലെ ഭാരവാഹികള്‍ ആവശ്യാനുസരണം ആരോഗ്യ സേവന മേഖലയില്‍ രംഗത്തിറങ്ങണമെന്നും സംസ്ഥാന പ്രസിഡന്റ് സയ്യിദ് ഹമീദലി ശിഹാബ് തങ്ങളും ജന. സെക്രട്ടറി സത്താര്‍ പന്തലൂരും അഭ്യര്‍ഥിച്ചു. പ്രതിരോധ പ്രവര്‍ത്തനങ്ങള്‍ക്ക് ഉപയോഗിക്കുന്ന സാമഗ്രികള്‍ക്ക് അമിത വില ഈടാക്കുന്നതും ബീവറേജ് ഔട്ട്‌ലെറ്റുകള്‍ തുറന്ന് പ്രവര്‍ത്തിക്കുന്നതും സര്‍ക്കാര്‍ കര്‍ശനമായി നിര്‍ത്തലാക്കണമെന്നും അവര്‍ ആവശ്യപ്പെട്ടു.