തിരുവനന്തപുരം: കൃത്യമായ ഇടപെടലുകളിലൂടെ ശിശുമരണ നിരക്ക് കുറയ്ക്കാന്‍ കഴിഞ്ഞിട്ടുണ്ടെന്ന് മന്ത്രി കെ.കെ ശൈലജ.
2016 ല്‍ 1000 ജനനങ്ങള്‍ നടക്കുമ്പോള്‍ 12 ശിശുക്കള്‍ മരിച്ചിരുന്നു. 2018ല്‍ ഇത് 10 ആയി കുറഞ്ഞു. 2020 ഓടെ ശിശുമരണ നിരക്ക് എട്ടായി ചുരുക്കലാണ് ലക്ഷ്യമിടുന്നത്. ദേശീയ ശരാശരി 42 ആണെന്ന ഘട്ടത്തിലാണിത്. മാതൃ മരണനിരക്കിലും കുറവ് വന്നിട്ടുണ്ട്. 2016ല്‍ ഒരു ലക്ഷം പ്രസവങ്ങള്‍ നടക്കുമ്പോള്‍ 67 അമ്മമാരാണ് മരിച്ചിരുന്നത്. 2018ല്‍ ഇത് 46 ആയി ചുരുക്കാന്‍ കഴിഞ്ഞു. ദേശീയ ശരാശരി 1,37,147 എണ്ണമായിരുന്ന ഘട്ടത്തിലാണിത്. മാതൃമരണനിരക്ക് ഒരു ലക്ഷം പ്രസവങ്ങളില്‍ 70 ആയി ചുരുക്കാനായിരുന്നു കേന്ദ്ര നിര്‍ദേശം കേന്ദ്ര ടാര്‍ഗറ്റ് പൂര്‍ത്തിയാക്കിയതിനൊപ്പം മാതൃമരണനിരക്ക് 46 ലേക്ക് താഴ്ത്തിയതിനും രണ്ട് കേന്ദ്ര അവാര്‍ഡുകള്‍ കേരളത്തിന് ലഭിച്ചു.
അട്ടപ്പാടിയിലെ ശിശുമരണങ്ങള്‍ ഉത്കണ്ഠയുണ്ടാക്കുന്നതാണ്. 13 മരണങ്ങളാണ് ഇവിടെ റിപ്പോര്‍ട്ട് ചെയ്തത്. ആശുപത്രിയില്‍ നിന്ന് വീടുകളിലെത്തിയ ശേഷമാണ് മരണങ്ങള്‍ നടന്നിരിക്കുന്നതെന്നും മന്ത്രി പറഞ്ഞു.