മലപ്പുറം: ആത്മീയ ചിന്തകളുടേയും ബൗദ്ധിക സംവാദങ്ങളുടെയും രാപ്പകലുകളുമായി എസ്. കെ. എസ്. എസ്. എഫ് നാഷനല്‍ കാംപസ് കാളിന് ഇന്ന് പെരിന്തല്‍മണ്ണ എം. ഇ. എ എന്‍ജിനീയറിങ് കോളജ് കാംപസില്‍ തുടക്കമാവും.
ഇന്ത്യയിലെ വിവിധ സര്‍വകലാശാലകളിലും പ്രൊഫഷനല്‍, ആര്‍ട്‌സ് ആന്‍ഡ് സയന്‍സ് കോളജുകളിലും പഠിക്കുന്ന 1500 വിദ്യാര്‍ഥികളാണ് മൂന്ന് ദിവസത്തെ പരിപാടിയിലെത്തുന്നത്. വിവിധ സെഷനുകളിലായി അക്കാദമിക് വിദഗ്ധര്‍, പണ്ഡിതര്‍, പത്രപ്രവര്‍ത്തകര്‍, പൗരപ്രമുഖര്‍ സംബന്ധിക്കും.
പരിപാടിയുടെ മുന്നോടിയായി ഉച്ചക്ക് രണ്ടിന് നാട്ടിക മൂസ മുസ്‌ലിയാരുടെ മഖ്ബറ സിയാറത്ത് നടക്കും. വൈകിട്ട് നാലിന് സുന്നി യുവജന സംഘം ട്രഷറര്‍ ഹാജി കെ. മമ്മദ് ഫൈസി പതാക ഉയര്‍ത്തും.
സയ്യിദ് ഒ. എം. എസ് തങ്ങളുടെ നേതൃത്വത്തില്‍ ബുര്‍ദ പാരായണവും തുടര്‍ന്ന് ഡോക്യുമെന്ററി പ്രദര്‍ശനവും നടക്കും. തുടര്‍ന്ന് നടക്കുന്ന തീം പ്രസന്റേഷന്‍ സെഷനില്‍ ഡോ. ബഹാഉദ്ദീന്‍ മുഹമ്മദ് നദ്‌വി, അബ്ദുല്‍ ഹമീദ് ഫൈസി അമ്പലക്കടവ്, അബ്ദുസ്സലാം ഫൈസി ഒളവട്ടൂര്‍ എന്നിവര്‍ സംബന്ധിക്കും