പി.എച്ച്.സി കെട്ടിടത്തിന്റെ പ്രവൃത്തി പൂര്‍ത്തീകരിക്കാന്‍ കഴിയാതെ വന്നതാണ് ഇവിടെയെത്തുന്ന രോഗികള്‍ക്ക് ദുരിതമായത്
പേരാവൂര്‍: കണിച്ചാര്‍ പി.എച്ച്.സിയിലെത്തുന്ന രോഗികള്‍ക്ക് ചികിത്സ മൃഗാശുപത്രിയില്‍. കാലാവധിക്കുളളില്‍ കരാറുകാരന്‍ കെട്ടിടത്തിന്റെ അറ്റകുറ്റപ്പണി പൂര്‍ത്തീകരിക്കാത്തതാണ് കാരണം. ഇവിടെ എത്തുന്ന രോഗികള്‍ ചികിത്സ മൃഗത്തിനാണോ അതോ മനുഷ്യനാണോ എന്ന ആശങ്കയുമായാണ് തിരികെപോകുന്നത്.
15 ലക്ഷം രൂപ മുടക്കിയാണ് കണിച്ചാര്‍ പി.എച്ച്.സിയുടെ അറ്റകുറ്റപണി നടത്താനായി പഞ്ചായത്ത് തീരുമാനിച്ചത്. ഇതിനായി കാഞ്ഞങ്ങാട് സ്വദേശിയായ ഒരു കരാറുകാരന്‍ പ്രവൃത്തി ഏറ്റെടുക്കുകയും ചെയ്തു. എന്നാല്‍ പ്രവൃത്തി പൂര്‍ത്തീകരിക്കാന്‍ കഴിയാതെ വന്നതോടെ കൊളക്കാട് സ്വദേശിയായ മറ്റൊരു കരാറുകാരന് പ്രവൃത്തി നല്‍കി.
എന്നാല്‍ കാലാവധി കഴിഞ്ഞിട്ടും പ്രവൃത്തി പൂര്‍ത്തീകരിക്കാന്‍ കഴിയാതെ വന്നതാണ് ഇവിടെയെത്തുന്ന രോഗികള്‍ക്ക് ദുരിതമായത്. പി.എച്ച്.സിയുടെ മുന്‍വശത്തുള്ള മൃഗാശുപത്രി കെട്ടിടത്തിലാണ് പി.എച്ച്.സിയും മൃഗാശുപത്രിയും ഒരുമിച്ച് പ്രവര്‍ത്തിക്കുന്നത്. കെട്ടിടത്തിന്റെ മേല്‍ക്കൂര അടക്കം പുതുക്കി പണിയേണ്ടതുകൊണ്ട് തന്നെ കെട്ടിടത്തിനകത്തുള്ള ഫര്‍ണിച്ചറുകളും മരുന്നുകളും സമീപത്തുള്ള കൃഷിഭവന്റെ ഹാളിലേക്കാണ് മാറ്റിയിരിക്കുന്നത്. കണിച്ചാര്‍ പഞ്ചായത്തില്‍ ഡങ്കിപ്പനിയും മറ്റും സ്ഥിരീകരിച്ച സാഹചര്യത്തില്‍ അധികൃതരുടെ ഈ അനാസ്ഥ കണ്ടില്ലെന്ന് നടിക്കാനാവില്ലെന്നാണ് നാട്ടുകാര്‍ പറയുന്നത്.