കുമ്പള: വീട്ടില്‍ സൂക്ഷിച്ച വിദേശ മദ്യവും പുകയില ഉല്‍പന്നങ്ങളും പിടിച്ചെടുത്തു മടങ്ങുന്നതിനിടെ എക്‌സൈസ് സംഘത്തിനു നേരെ അക്രമം. കുമ്പള എക്‌സൈസ് ഇന്‍സ്‌പെക്ടര്‍ പി.ജെ റോബിന്‍ബാബുവിന്റെ കൃത്രിമക്കാല്‍ വലിച്ചൂരി മര്‍ദിച്ചതായും പരാതി. അക്രമത്തില്‍ എക്‌സൈസ് സിവില്‍ ഓഫിസര്‍മാരായ ടി.വി റിന, എം സജിത്, കെ നൗഷാദ്, എ ശ്രീകാന്ത്, ഡ്രൈവര്‍ മൈക്കിള്‍ ജോസഫ് എന്നിവര്‍ക്കും പരുക്കേറ്റു. ഇവര്‍ ഉപ്പളയിലെ സ്വകാര്യാശുപത്രിയില്‍ ചികിത്സ തേടി.
കഴിഞ്ഞ ദിവസം രാത്രി എട്ടോടെ ബേക്കൂര്‍ സുഭാഷ് നഗറിലാണു സംഭവം. സംഭവവുമായി ബന്ധപ്പെട്ട് പ്രദീപ്, രാജേഷ് എന്നിവരും രണ്ടു സ്ത്രീകളുമുള്‍പ്പെടെ പത്തു പേര്‍ക്കെതിരേ മഞ്ചേശ്വരം പൊലിസ് കേസെടുത്തു. സുഭാഷ് നഗറിലെ രാജേഷിന്റെ വീട്ടില്‍ വിദേശ മദ്യം സൂക്ഷിച്ചതായുള്ള രഹസ്യ വിവരത്തെ തുടര്‍ന്നു നടത്തിയ പരിശോധനയില്‍ വീടിന്റെ പല ഭാഗത്തായി സൂക്ഷിച്ച 12 ബോക്‌സ് വിദേശ മദ്യം, 31 കുപ്പി മദ്യം, പത്തു കിലോ പുകയില ഉല്‍പന്നങ്ങള്‍ എന്നിവ എക്‌സൈസ് സംഘം പിടിച്ചെടുത്തു. ഇവ ജീപ്പിലേക്കു കയറ്റുന്നതിനിടെയാണു സ്ത്രീകളടങ്ങുന്ന സംഘമെത്തി ഇവരെ അക്രമിച്ചത്.
പിടിച്ചെടുത്ത  മദ്യം ജീപ്പില്‍ നിന്നു തിരികെയെടുത്തു രക്ഷപ്പെട്ടവരെ എക്‌സൈസ് സംഘം പിന്തുടര്‍ന്നു. തുടര്‍ന്ന് ഇരു വിഭാഗങ്ങളും തമ്മില്‍ നടന്ന സംഘട്ടനത്തിലാണ് ഇന്‍സ്‌പെക്ടറുടെ കാല്‍ വലിച്ചൂരി മര്‍ദിച്ചത്. 2003ലുണ്ടായ വാഹനാപകടത്തിലാണ് അദ്ദേഹത്തിന്റെ വലതു കാല്‍ നഷ്ടപ്പെട്ടത്.
അക്രമവിവരമറിഞ്ഞ് മഞ്ചേശ്വരം എസ്.ഐ ജി അനില്‍ കുമാര്‍, കുമ്പള എസ്.ഐ മെല്‍വിന്‍ ജോസ് എന്നിവരുടെ നേതൃത്വത്തില്‍ പൊലിസ് സ്ഥലത്തെത്തുമ്പോഴേക്കും അക്രമി സംഘം ഓട്ടോയില്‍ രക്ഷപ്പെട്ടു. എക്‌സൈസ് സംഘം റെയ്ഡില്‍ പിടിച്ചെടുത്തതില്‍ നിന്ന് അഞ്ചു ബോക്‌സ് മദ്യവുമായാണു സംഘം കടന്നു കളഞ്ഞതെന്നു എക്‌സൈസ് ഉദ്യോഗസ്ഥര്‍ പറഞ്ഞു.
അക്രമികള്‍ക്കെതിരേ മഞ്ചേശ്വരം പൊലിസ് കേസെടുത്ത് അന്വേഷണമാരംഭിച്ചു. അതേ സമയം എക്‌സൈസ് സംഘം അക്രമിച്ചതായി ആരോപിച്ച് ബേക്കൂര്‍ സുഭാഷ് നഗറിലെ പ്രദീപ (25), രമ്യ (19) എന്നിവര്‍ കുമ്പള സഹകരണാശുപത്രിയില്‍ ചികിത്സ തേടിയിട്ടുണ്ട്.