ന്യൂഡല്‍ഹി: പരസ്യങ്ങളില്‍ അനുമതിയില്ലാതെ പ്രധാനമന്ത്രി നരേന്ദ്രമോദിയുടെ ചിത്രം ഉപയോഗിച്ചതിന് റിലയന്‍സ് ജിയോയും പേടിഎമ്മും മാപ്പു പറഞ്ഞു. സംഭവത്തില്‍ വിശദീകരണം ആവശ്യപ്പെട്ട് കേന്ദ്രസര്‍ക്കാര്‍ ഇരു കമ്പനികള്‍ക്കും നോട്ടീസ് അയച്ചിരുന്നു. കഴിഞ്ഞ വര്‍ഷം സെപ്റ്റംബറില്‍ ഇന്ത്യയില്‍ സേവനം ആരംഭിക്കുമ്പോള്‍ പ്രധാനമന്ത്രി നരേന്ദ്രമോദിയുടെ ചിത്രം ഉള്‍ക്കൊള്ളിച്ചു കൊണ്ടുള്ള പരസ്യം ജിയോ നല്‍കിയിരുന്നു.

1950ലെ പേരുകളും ചിഹ്നങ്ങളും സംരക്ഷിക്കുന്ന നിയമത്തിന്റെ ലംഘനമാണ് ഇരുകമ്പനികളും നടത്തിയതെന്ന് ആരോപിച്ചായിരുന്നു സര്‍ക്കാരിന്റെ നോട്ടീസ്. കഴിഞ്ഞ വര്‍ഷമായിരുന്നു ജിയോ മൊബൈല്‍ നെറ്റ്‌വര്‍ക് ഇന്ത്യയില്‍ സൗജന്യ സേവനം ആരംഭിച്ചത്. ഈ സമയത്താണ് പരസ്യത്തില്‍ പ്രധാനമന്ത്രിയുടെ ചിത്രം ഉപയോഗിച്ചത്.

നോട്ട് പിന്‍വലിക്കലിന് ശേഷമുള്ള ഇ-ട്രാന്‍സാക്ഷനുമായി ബന്ധപ്പെട്ട പരസ്യത്തിലാണ് പേടിഎം ആപ് പരസ്യത്തിനായി പ്രധാനമന്ത്രിയുടെ ചിത്രം ഉപയോഗിച്ചിരുന്നത്. ഈ പരസ്യങ്ങള്‍ വിവാദമായിരുന്നു.തുടര്‍ന്ന് കമ്പനികള്‍ക്ക് പിഴയും ചുമത്തിയിരുന്നു.