ഹരിപ്പാട്: കുട്ടികള്‍ മണ്ണും ഭാഷയും അറിഞ്ഞു വളരാന്‍ സാഹചര്യങ്ങള്‍ ഒരുക്കണമെന്ന് കവി പ്രൊഫ.വി മധുസൂദനന്‍ നായര്‍ അഭിപ്രായപ്പെട്ടു.
മണ്ണാറശാല സ്‌കൂള്‍ ഫെസ്റ്റ് 2017ല്‍ വിശിഷ്ടാതിഥിയായി പങ്കെടുത്ത് സംസാരിക്കുകയായിരുന്നു അദ്ദേഹം.
കുട്ടികളില്‍ സമത്വവും സാഹോദര്യവും കാത്തുസൂക്ഷിക്കുന്നതില്‍ പൊതുവിദ്യാലയങ്ങളുടെ പങ്ക് വളരെ വലുതാണ്.മറ്റ് ഭാഷകളേക്കാള്‍ മാതൃഭാഷയ്ക്ക് പ്രാധാന്യം നല്‍കുന്ന പുതുതലമുറ ഉദയം ചെയ്യണമെന്നും അദ്ദേഹം പറഞ്ഞു.
 സ്‌കൂള്‍ മാനേജര്‍ ബ്രഹ്മശ്രീ.എം.കെ പരമേശ്വരന്‍ നമ്പൂതിരി പതാക ഉയര്‍ത്തി.ഹരിപ്പാട് നഗരസഭാ ചെയര്‍പേഴ്‌സണ്‍ പ്രൊഫ.സുധാ സുശീലന്‍ ഉദ്ഘാടനം ചെയ്തു.വാര്‍ഡ് കൗണ്‍സിലര്‍ രാധാമണിയമ്മ അധ്യക്ഷത വഹിച്ചു.ഉപജില്ലാ വിദ്യാഭ്യാസ ഓഫീസര്‍ കെ.വി ഷാജി മുഖ്യപ്രഭാഷണം നടത്തി.പാഠ്യപഠ്യേതര രാഗത്ത് മികച്ച വിജയം നേടിയ വിദ്യാര്‍ത്ഥികളെ അനുമോദിച്ചു.
പന്ത്രണ്ട് വര്‍ഷം സ്‌കൂള്‍ പി.ടി.എ പ്രസിഡന്റായിരുന്ന സതീഷ് അപ്പുറത്തെ ആദരിച്ചു.
നഗരസഭാ കൗണ്‍സിലര്‍ ആര്‍.രതീഷ്,മണ്ണാറശാല ശ്രീ.നാഗരാജ വിദ്യാപീഠം പ്രിന്‍സിപ്പല്‍ കെ.എന്‍ ശര്‍മ്മ,എം.പി.ടി.എ പ്രസിഡന്റ് എസ് ശൈലജ,അദ്ധ്യാപകന്‍ എന്‍.ജയദേവന്‍ എന്നിവര്‍ സംസാരിച്ചു.
പ്രഥമാധ്യാപകന്‍ എസ്.നാഗദാസ് സ്വാഗതവും,സ്റ്റാഫ് സെക്രട്ടറി കെ.കവിത നന്ദിയും പറഞ്ഞു.