നീലേശ്വരം: പുതിയ അധ്യയന വര്‍ഷത്തില്‍ പടന്നക്കാട് കാര്‍ഷിക കോളജില്‍ അധ്യാപക ക്ഷാമമുണ്ടാകില്ലെന്നു കൃഷിമന്ത്രി വി.എസ് സുനില്‍കുമാര്‍. അധ്യാപകരെ നിയമിക്കാനുള്ള ഇന്റര്‍വ്യൂ ഈ മാസം പൂര്‍ത്തിയാകും. ഇവിടെ നിയമിക്കപ്പെടുന്ന ജീവനക്കാര്‍ സ്ഥലം മാറി പോകുന്ന പ്രവണത ഇനി ഉണ്ടാവില്ല. മാത്രമല്ല ഇങ്ങനെ പോയവര്‍ സര്‍വകലാശാല ആസ്ഥാനത്തേക്കുവരെ കൊണ്ടുപോയ തസ്തികകളും തിരികെ കൊണ്ടുവരുമെന്നും മന്ത്രി പറഞ്ഞു. വിവിധ യൂനിയന്‍ നേതാക്കളാണ് സ്ഥലം മാറ്റ ശുപാര്‍ശയുമായി എത്തുന്നത്. ഇനി ഇത് അനുവദിക്കില്ലെന്നും അദ്ദേഹം കൂട്ടിച്ചേര്‍ത്തു. അധ്യാപക, അനധ്യാപക ജീവനക്കാരുടെ ക്ഷാമം പരിഹരിച്ചാകും സീറ്റ് വര്‍ധനയെന്നും മന്ത്രി സൂചിപ്പിച്ചു. കാര്‍ഷിക കോളജിലെ അധ്യാപക ക്ഷാമം സുപ്രഭാതം റിപ്പോര്‍ട്ട് ചെയ്തിരുന്നു.