കാസര്‍കോട്: എന്‍ഡോസള്‍ഫാന്‍ കിടപ്പുരോഗിയെ പരിശോധിച്ച് അര്‍ഹനെന്ന് കാണുന്നപക്ഷം ആശ്വാസ ധനസഹായം നല്‍കണമെന്ന് സംസ്ഥാന മനുഷ്യാവകാശ കമ്മിഷന്‍.
എന്‍മകജെ സ്വദേശി ഷേണിയില്‍ ബാബുവിന്റെ പരാതിയിലാണ് നടപടി. കാസര്‍കോട് കലക്ടര്‍ക്കാണ് കമ്മിഷന്‍ അംഗം കെ. മോഹന്‍കുമാര്‍ ഉത്തരവ് നല്‍കിയത്. രണ്ട് കണ്ണുകള്‍ക്കും കാഴ്ചയില്ലാത്ത ബാബു പൂര്‍ണമായും കിടപ്പിലാണെന്ന് പരാതിയില്‍ പറയുന്നു. പ്രതിമാസം 1700 രൂപ പെന്‍ഷന്‍ കിട്ടുന്നതല്ലാതെ വേറെ വരുമാനങ്ങളൊന്നുമില്ലെന്നും പരാതിയില്‍ പറയുന്നു. എന്‍ഡോസള്‍ഫാന്‍ രോഗികള്‍ക്ക് ധനസഹായം നല്‍കുന്നത് സംബന്ധിച്ച് മനുഷ്യാവകാശ കമ്മിഷന്‍ കാസര്‍കോട് കലക്ടറില്‍നിന്ന് റിപ്പോര്‍ട്ട് വാങ്ങിയിരുന്നു. പൂര്‍ണമായും കിടപ്പിലായവര്‍, ബുദ്ധിമാന്ദ്യം സംഭവിച്ചവര്‍, ശാരീരിക വൈകല്യമുള്ളവര്‍, മരിച്ചവരുടെ ആശ്രിതര്‍ എന്നിവര്‍ക്കാണ് ദേശീയ മനുഷ്യാവകാശ കമ്മിഷന്റെ നിര്‍ദേശ പ്രകാരം പ്രത്യേക ധനസഹായം അനുവദിക്കുന്നതെന്ന് കലക്ടറുടെ റിപ്പോര്‍ട്ടില്‍ പറയുന്നു. എന്നാല്‍ പരാതിക്കാരനായ ബാബു പ്രത്യേക ധനസഹായം അനുവദിക്കാന്‍ കഴിയുന്ന വിഭാഗത്തില്‍ ഉള്‍പ്പെടാത്തതിനാല്‍ ധനസഹായം അനുവദിക്കാന്‍ കഴിയില്ലെന്നും സൗജന്യ ചികിത്സയും പ്രതിമാസ പെന്‍ഷനും നല്‍കുന്നുണ്ടെന്നും റിപ്പോര്‍ട്ടില്‍ പറയുന്നു.
അതേസമയം പരാതിക്കാരന്റെ നിലവിലെ സ്ഥിതി പരിശോധിച്ച് ബോധ്യപ്പെട്ടാണോ ജില്ലാ കലക്ടര്‍ റിപ്പോര്‍ട്ട് നല്‍കിയതെന്ന് വ്യക്തമല്ലെന്ന് കമ്മിഷന്‍ ഉത്തരവില്‍ പറഞ്ഞു. ആശ്വാസ ധനസഹായം നല്‍കേണ്ടവരുടെ ലിസ്റ്റ് തയാറാക്കിയപ്പോഴുള്ള പരാതിക്കാരന്റെ അവസ്ഥയില്‍നിന്ന് ഇപ്പോള്‍ മാറ്റമുണ്ടോയെന്ന് നിയമാനുസരണം വിലയിരുത്തണമെന്നും കമ്മിഷന്‍ ആവശ്യപ്പെട്ടു.