തിരുവനന്തപുരം: ഹൈക്കോടതിയുടെ മുന്നില്‍ അഭിഭാഷകരും മാധ്യമപ്രവര്‍ത്തകരും തമ്മിലുണ്ടായ സംഘര്‍ഷത്തെ കുറിച്ച് അന്വേഷിച്ച് റിപ്പോര്‍ട്ട് സമര്‍പ്പിക്കാന്‍ നിയമിച്ച ജസ്റ്റിസ് (റിട്ട.) പി.എ മുഹമ്മദ് കമ്മിഷന്റെ കാലാവധി ആറു മാസത്തേക്കു കൂടി നീട്ടിനല്‍കാന്‍ മന്ത്രിസഭാ യോഗം തീരുമാനിച്ചു.
ഇനി നീട്ടിനല്‍കില്ലെന്ന നിബന്ധനയോടെ, 2018 മെയ് 14 മുതല്‍ ആറു മാസത്തെ കാലാവധിയാണ് അനുവദിച്ചത്.
ഹൈക്കോടതിക്കു മുന്നില്‍ അഭിഭാഷകര്‍ മാധ്യമപ്രവര്‍ത്തകരെ അക്രമിച്ചതിനെ തുടര്‍ന്നുണ്ടായ തര്‍ക്കം രണ്ടു വര്‍ഷം പിന്നിട്ടിട്ടും ഇതുവരെ പരിഹാരമായിട്ടില്ല.
ഇരുവിഭാഗത്തെയും ഉള്‍പ്പെടുത്തി മുഖ്യമന്ത്രി പിണറായി വിജയന്‍ ചര്‍ച്ച നടത്തുകയും തര്‍ക്കപരിഹാരത്തിന് അഡ്വക്കറ്റ് ജനറല്‍ അധ്യക്ഷനായ സമിതി രൂപീകരിക്കുകയും ചെയ്‌തെങ്കിലും ഫലമുണ്ടായില്ല.