പെര്‍ള: പ്ലാന്റേഷന്‍ കോര്‍പറേഷന്‍ ഉടമസ്ഥതയിലുള്ള സ്ഥലത്ത് വന്‍ തീപിടിത്തം. പതിനഞ്ച് ഏക്കര്‍ സ്ഥലം കത്തി നശിച്ചു. ഇന്നലെ വൈകുന്നേരം ആറരയോടെയാണു റബര്‍ തോട്ടത്തില്‍ തീപിടിത്തമുണ്ടായത്. പ്ലാന്റേഷന്‍ കോര്‍പറേഷനു താഴെ പതിനഞ്ചോളം കുടുംബങ്ങള്‍ താമസിക്കുന്ന കുണ്ടാപ്പ് കോളനിയിലേക്ക് തീ പടരാതിരുന്നതു കാരണം വന്‍ ദുരന്തം ഒഴിവായി.
കുടുംബങ്ങളില്‍ രണ്ടു പേര്‍ എന്‍ഡോസള്‍ഫാന്‍ ദുരിത ബാധിതരാണ്. നാട്ടുകാരുടെ സമയോചിതമായ ഇടപ്പെടല്‍മൂലം മണിക്കൂറുള്‍ക്കു ശേഷമാണ് തീ അണച്ചത്. കാസര്‍കോടു നിന്ന് അഗ്നിശമന വിഭാഗം സ്ഥലത്തെത്തിയെങ്കിലും വാഹനം കടന്നു പോകുവാന്‍ റോഡില്ലാത്തതിനാല്‍ നോക്കി നില്‍ക്കാനെ കഴിഞ്ഞുള്ളു. എന്‍ഡോസള്‍ഫാന്‍ ദുരിത ബാധിത പ്രദേശത്തേക്ക് എല്ലാ വിധ ആനുകൂല്യങ്ങളും സര്‍ക്കാര്‍ പ്രഖ്യാപിക്കുമ്പോഴും അതൊന്നും ഇവിടെ എത്താറില്ലെന്നതിലേക്കാണ് ഇതു വിരല്‍ ചൂണ്ടുന്നത്.പ്രദേശത്ത് ബാബു മൂല്യ (45), ഷേഷപ്പ (48) എന്നീ എന്‍ഡോസള്‍ഫാന്‍ ദുരിതബാധിതരുണ്ടായിട്ടു പോലും സഞ്ചാരയോഗ്യമായ റോഡോ മറ്റു അടിസ്ഥാന സൗകര്യങ്ങളോ ഇവിടെയില്ല.