കോഴിക്കോട്: സംസ്ഥാന മന്ത്രിസഭയുടെ രണ്ടാം വാര്‍ഷികാഘോഷം ജില്ലാ ഭരണകൂടം 'കോഴിക്കോട് ഫെസ്റ്റ്-2018' ആയി വിപുലമായി ആഘോഷിക്കുന്നു. ഇന്ന് നഗരത്തില്‍ നടക്കുന്ന ഘോഷയാത്രയോടെ 16 വരെ നീണ്ടുനില്‍ക്കുന്ന ആഘോഷ പരിപാടികള്‍ക്ക് തുടക്കമാകും. ബീച്ചിലാണ് ഫെസ്റ്റ് നടക്കുക. ഫെസ്റ്റിന്റെ ഭാഗമായി ഉല്‍പന്ന പ്രദര്‍ശന വിപണനമേളയും ഭക്ഷ്യമേളയും സാംസ്‌കാരിക പരിപാടികളും ഉണ്ടാകുമെന്ന് ജില്ലാ കലക്ടര്‍ യു.വി ജോസ് വാര്‍ത്താസമ്മേളനത്തില്‍ അറിയിച്ചു. ഇന്ന് ഉച്ചയ്ക്ക് മൂന്നിന് സ്റ്റേഡിയം പരിസരത്തു നിന്നാരംഭിക്കുന്ന ഘോഷയാത്ര ബീച്ചില്‍ സമാപിക്കും. തുടര്‍ന്ന് അഞ്ചിന് കോഴിക്കോട് ഫെസ്റ്റ് തൊഴില്‍-എക്‌സൈസ് മന്ത്രി ടി.പി രാമകൃഷ്ണന്‍ ഉദ്ഘാടനം ചെയ്യും. പട്ടയവിതരണവും മന്ത്രി നിര്‍വഹിക്കും. മുഖ്യമന്ത്രിയുടെ ദുരിതാശ്വാസ നിധിയുടെ വിതരണോദ്ഘാടനം ഗതാഗത മന്ത്രി എ.കെ ശശീന്ദ്രന്‍ നിര്‍വഹിക്കും. വൈകിട്ട് 6.30ന് റാഫി-മുകേഷ് മ്യൂസിക്കല്‍ നൈറ്റ് അരങ്ങേറും.
നാളെ മുതല്‍ 16 വരെ വിവിധ വകുപ്പുകളുടെ പ്രദര്‍ശനങ്ങള്‍ക്കു പുറമെ സെമിനാറുകളും നടക്കും. എല്ലാ ദിവസവും വൈകിട്ട് സാംസ്‌കാരിക പരിപാടികളുമുണ്ടാകും. സമാപന ദിവസം കവി പ്രഭാവര്‍മ രചിച്ച ആറു ഗാനങ്ങള്‍ ഉള്‍പ്പെടുത്തിയ നവകേരളം ഡെമോക്രാറ്റിക് മ്യൂസിക് ബാന്‍ഡ് അരങ്ങേറും.
കുടുംബശ്രീ ഉല്‍പന്ന പ്രദര്‍ശന വിപണനത്തിന് 20 സ്റ്റാളുകള്‍ ഒരുക്കും. കൂടാതെ വിവിധ സര്‍ക്കാര്‍ വകുപ്പുകളുടെ സേവനങ്ങളെക്കുറിച്ച് ജനങ്ങള്‍ക്ക് നേരിട്ടു മനസിലാക്കാവുന്ന പ്രദര്‍ശനങ്ങളും ഒരുക്കിയിട്ടുണ്ട്. ആധാര്‍ ഉള്‍പ്പെടെയുള്ള ഡിജിറ്റല്‍ സേവനങ്ങള്‍ നല്‍കാന്‍ ഐ.ടി മിഷന്റെ സ്റ്റാളുമുണ്ടാകും. ഇന്‍ഫര്‍മേഷന്‍ പബ്ലിക് റിലേഷന്‍സ് വകുപ്പും ജില്ലാ ഇന്‍ഫര്‍മേഷന്‍ വകുപ്പും ജില്ലാ ഭരണകൂടവും സംയുക്തമായി സംഘടിപ്പിക്കുന്ന ഫെസ്റ്റിലേക്കുള്ള പ്രവേശനം സൗജന്യമാണ്.
കലക്ടറേറ്റ് കോണ്‍ഫറന്‍സ് ഹാളില്‍ നടന്ന വാര്‍ത്താസമ്മേളനത്തില്‍ ജില്ലാ പഞ്ചായത്ത് പ്രസിഡന്റ് ബാബു പറശ്ശേരി, സബ് കലക്ടര്‍ വി. വിഘ്‌നേശ്വരി, കോര്‍പറേഷന്‍ ഡെപ്യൂട്ടി മേയര്‍ മീരാ ദര്‍ശക്, ദുരന്തനിവാരണ ഡെപ്യൂട്ടി കലക്ടര്‍ പി.പി കൃഷ്ണന്‍ കുട്ടി, ഡെപ്യൂട്ടി കലക്ടര്‍ ഷാമില്‍ സെബാസ്റ്റ്യന്‍, ജില്ലാ ഇന്‍ഫര്‍മേഷന്‍ ഓഫിസര്‍ എം. മധുസൂദനന്‍ എന്നിവരും പങ്കെടുത്തു.