മങ്കട: ഇടിമിന്നലേറ്റ് വീട് തകര്‍ന്നു. വീടിനകത്ത് ഉറങ്ങി കിടക്കുകയായിരുന്ന ഗൃഹനാഥന്‍ അത്ഭുതകരമായി രക്ഷപ്പെട്ടു. കുറുവ പഞ്ചായത്തിലെ രണ്ടാം വാര്‍ഡിലെ ചുള്ളിയില്‍ കുന്നുംപുറത്തെ മാണീരി മജീദിന്റെ വീടാണ് തകര്‍ന്നത്. ചൊവ്വാഴ്ച രാത്രി പത്തരയോടെയാണ് സംഭവം.
ഉയര്‍ന്ന പ്രദേശത്തുള്ള മജീദിന്റെ ഓടുമേഞ്ഞ വീടിന്റെ മേല്‍ക്കുര, ചുമര്, ഗൃഹോപകരണങ്ങള്‍, വയറിങ് ഉള്‍പ്പെടെ നശിച്ചു. വീടിനകത്ത് കിടന്നുറങ്ങുകയായിരുന്ന മജീദ് കിടന്ന കട്ടില്‍, ബെഡ് എന്നിവക്ക് മിന്നലേറ്റ് തീപിടിച്ചു. മജീദിന്റെ ഭാര്യയും മക്കളും ആശുപത്രിയിലായതിനാല്‍ സംഭവസമയത്ത് വീട്ടില്‍ മജീദ് തനിച്ചായിരുന്നു. പെരിന്തല്‍മണ്ണ തഹസില്‍ദാര്‍, വില്ലേജ് ഓഫിസര്‍, ബ്ലോക്ക് പ്രസിഡന്റ് ഷഹീദ ഏലിക്കോട്ടില്‍, ജില്ലാ പഞ്ചായത്തംഗം അഡ്വ. ടി.കെ റഷീദലി, കുറുവ ഗ്രാമപഞ്ചായത്ത് പ്രസിഡന്റ് മുല്ലപള്ളി യുസഫ്, സി.പി.എം മങ്കട ഏരിയ സെക്രട്ടറി പി.കെ അബ്ദുല്ലനവാസ് സ്ഥലം സന്ദര്‍ശിച്ചു.