നെടുങ്കണ്ടം: രണ്ട് കി.ഗ്രാം കഞ്ചാവുമായി തമിഴ്‌നാട് സ്വദേശിയായ മധ്യവയസ്‌കന്‍ പിടിയിലായി. പൂപ്പാറക്കടുത്ത് ചതുരംഗപ്പാറ എസ്റ്റേറ്റ് ലയത്തില്‍ താമസിക്കുന്ന മുരുകേശന്‍ (52) ആണ് എക്‌സൈസിന്റെ പിടിയിലായത്.
കഴിഞ്ഞ ദിവസം ഉടുമ്പന്‍ചോല ടൗണിനു സമീപം കൊച്ചി സ്വദേശികളായ കൗമാരക്കാരെ എക്‌സൈസ് ചോദ്യംചെയ്തതിന്റെ ഫലമായാണ് ഇയാളെ പിടികൂടാനായത്. കഞ്ചാവ് വേണമോയെന്ന് ചോദിച്ച് മുരുകേശന്‍ സമീപിച്ചതായും ആവശ്യം വന്നാല്‍ വിളിക്കാനായി മൊബൈല്‍ നമ്പരും ഇവര്‍ക്ക് കൈമാറിയിരുന്നു. ഇവരെ ഉപയോഗിച്ചാണ് എക്‌സൈസ് മുരുകേശനെ പിടികൂടിയത്. ഉടുമ്പന്‍ചോല എക്‌സൈസ് ഇന്‍സ്‌പെക്ടര്‍ എസ്. ഷാജി, എക്‌സൈസ് ഉദ്യോഗസ്ഥരായ ആസിഫ് അലി, രാധാകൃഷ്ണന്‍, ശശികുമാര്‍, ശശീന്ദ്രന്‍, ഷിജു, ജോഫിന്‍, ലിജോ, ഷിബു, സേവ്യര്‍, ചെറിയാന്‍ എന്നിവരടങ്ങിയ സംഘമാണ് മുരുകേശനെ പിടികൂടിയത്.