കൊളത്തൂര്‍:  മുന്തിരി ഇനി നാട്ടുംപുറത്തും. ഓണപ്പുട വെസ്റ്റ്ഹില്ലില്‍ പൊടിയാട്ട് തൊടി മുസ്തഫയുടെ വീട്ടു മുറ്റത്താണു മുന്തിരികൃഷി വിജയിച്ചത്.  തണുപ്പുകുറഞ്ഞ സ്ഥലങ്ങളില്‍  വിളവുണ്ടാകില്ല എന്ന പഴയ പല്ലവി ഇനിയില്ല.
വഴിയോര കച്ചവടക്കാരില്‍ നിന്നു വാങ്ങിയ ചെടിതൈകളിലാണ് ഇപ്പോള്‍ മുന്തിരി കുലകള്‍ പാകമായി നില്‍ക്കുന്നത്. ആറുമാസം മുമ്പു കൗതുകത്തിനു വാങ്ങിയ രണ്ടു മുന്തിരി തൈകളാണിത്. രണ്ട് മുന്തിരി തൈകള്‍ 120 രൂപക്കാണ് അന്നു വാങ്ങിയത്.
രാസവളം പ്രയോഗിക്കാതെയാണു കൃഷി. വേനലായപ്പോള്‍ ഇടക്കിടക്കു  വെള്ളം നനക്കും. വീടിന്റെ മുന്‍വശത്തു പന്തലൊരുക്കിയാണു മുന്തിരി വള്ളികള്‍ പടര്‍ത്തിയത്. ഒരു ഡസനോളം കുലകളുമുണ്ട്. ഇതിനോടകം മുന്തിരിക്കുല പാകമായതു വീട്ടുകാര്‍ പറിച്ചെടുത്തിരുന്നു. മധുരമേറിയതും കുരുവുള്ളതുമായ മുന്തിരി ഇനത്തില്‍പ്പെട്ടവയാണിവ.