മാനന്തവാടി: പടിഞ്ഞാറത്തറ-പൂഴിത്തോട് ബദല്‍ റോഡ് യാഥാര്‍ഥ്യമാക്കാന്‍ മുഖ്യമന്ത്രി പിണറായി വിജയന്‍ അടിയന്തരമായി ഇടപെടണമെന്ന് ജനാധിപത്യ കേരളാ കോണ്‍ഗ്രസ് ജില്ലാ ഭാരവാഹികള്‍ വാര്‍ത്താ സമ്മേളനത്തില്‍ ആവശ്യപ്പെട്ടു.
1993ല്‍ സര്‍വേ നടത്തി പ്രത്യേക ചുരം ഡിവിഷന്‍ വടകരയില്‍ ആരംഭിച്ച് 1994ല്‍ 9.6 കോടി വകയിരുത്തി 70 ശതമാനം പണി പൂര്‍ത്തീകരിച്ചതാണ് പ്രസ്തുത റോഡ്.
52 ഏക്കര്‍ വനഭൂമിക്ക് പകരം വനവല്‍ക്കരണത്തിനായി 104 ഏക്കര്‍ ഭൂമി വിട്ടു നല്‍കുകയും ചെയ്തിരുന്നു. പദ്ധതി പൂര്‍ത്തിയായാല്‍ വയനാടിന്റെ കാര്‍ഷിക-വാണിജ്യ മേഖലയില്‍ വന്‍ കുതിച്ചു ചാട്ടത്തിനു കാരണമാകും.
പരമ്പരാഗത കാര്‍ഷിക മേഖലയില്‍ തളര്‍ച്ച നേരിടുന്ന വയനാടിന്റെ മുഖം മാറ്റുവാന്‍ ഈ പദ്ധതി അനിവാര്യമാണ്. കഴിഞ്ഞ ഡിസംബര്‍ 28ന് കല്‍പ്പറ്റ എം.എല്‍.എയുടെ നേതൃത്വത്തില്‍ പടിഞ്ഞാറത്തറയില്‍ സര്‍വകക്ഷിയോഗം വിളിച്ചു കൂട്ടി പടിഞ്ഞാറത്തറ പൂഴിത്തോട് ബദല്‍ റോഡ് കര്‍മ സമിതിക്ക് രൂപം നല്‍കി ഭാരവാഹികളെ തിരഞ്ഞെടുത്ത് നടപടികളുമായി മുന്‍പോട്ടു പോകുവാന്‍ തിരുമാനിച്ചിരുന്നെങ്കിലും നാളിതുവരെ ഒരു യോഗം പോലും വിളിച്ചുകൂട്ടാത്ത എം.എല്‍.എയുടെയും ബന്ധപ്പെട്ട തദ്ദേശ സ്വയംഭരണ സ്ഥാപന മേധാവികളുടെയും നടപടി അങ്ങേയറ്റം അപലപനീയമാണെന്നും നേതാക്കള്‍ കുറ്റപ്പെടുത്തി.
പൊതുമരാമത്ത് മന്ത്രി ചീഫ് എന്‍ജിനീയറെ നേരിട്ട് വിളിച്ച് ഡി.പി.ആര്‍ തയാറാക്കുവാന്‍ അടിയന്തര ഉത്തരവു നല്‍കിയിട്ടും പൊതുമരാമത്ത് ഉദ്യോഗസ്ഥര്‍ അനങ്ങാപാറ നയം തുടരുന്നത് വയനാട്ടിലെ ജനങ്ങളോടും ജനാധിപത്യതോടുമുള്ള കടുത്ത വെല്ലുവിളിയുമാണെന്ന് നേതാക്കള്‍ കുറ്റപ്പെടുത്തി. വാര്‍ത്താസമ്മേളനത്തില്‍ ജില്ലാ പ്രസിഡന്റ് കെ.എ ആന്റണി, വിന്‍സണ്‍ നെടുംകൊമ്പില്‍, കെ.എം പൗലോസ് പങ്കെടുത്തു.