നാദാപുരം: മാരകായുധങ്ങളുമായി യൂത്ത് ലീഗ് പ്രവര്‍ത്തകനെ വധിക്കാനെത്തിയ ക്വട്ടേഷന്‍ സംഘത്തിലെ മൂന്നു പേര്‍ പൊലിസ് പിടിയിലായി. സംഘത്തിലുണ്ടായിരുന്ന നാലു പേര്‍ ഓടി രക്ഷപ്പെട്ടു. പെരുമുണ്ടശ്ശേരി മഠത്തും താഴക്കുനി അമീര്‍(28), മലയില്‍ റഹീം (23), കടമേരിയിലെ കുനോം താഴക്കുനി മുനീര്‍ (28) എന്നിവരാണ് പിടിയിലായത്. നാദാപുരം കൊട്ടാരം ഫര്‍ണിച്ചറിനു സമീപം കരാട്ടേ ക്ലാസ് നടത്തുന്ന കടമേരി എളയടംശാഖാ യൂത്ത് ലീഗ് വൈസ് പ്രസിഡന്റ് മുണ്ടോളം വീട്ടില്‍ റാഷിദിനെ ലക്ഷ്യമിട്ടാണ് സംഘം കഴിഞ്ഞ ദിവസം രാത്രി 9. 30 ഓടെ   നാദാപുരത്തെത്തിയതെന്ന് പൊലിസ് പറഞ്ഞു.    എന്നാല്‍ നാദാപുരം എസ്.ഐ കെ. എസ്അജേഷിന്റെ സന്ദര്‍ഭോചിതമായ ഇടപെടല്‍ മൂലം ഇവരുടെ ദൗത്യം പരാജയപ്പെടുകയായിരുന്നു. ടൗണിലെ ഒരു കടയ്ക്ക് സമീപം സംശയാസ്പദമായ നിലയില്‍ കണ്ട ടെംപോട്രാവലര്‍ വാഹനം പരിശോധിച്ച എസ്.ഐ മാരകായുധങ്ങളുമായി എത്തിയ സംഘത്തിലെ മൂന്നു പേരെ കൈയോടെ പിടികൂടുകയായിരുന്നു.
ഇതിനിടയിലാണ് മറ്റുള്ളവര്‍ ഓടി രക്ഷപ്പെട്ടത്. ഇവരില്‍ നിന്നും രണ്ടു വടിവാള്‍, സ്പ്രിങിന്റെ സഹായത്തോടെ പ്രവര്‍ത്തിക്കുന്ന പ്രത്യേകതരം ആയുധം, ഇരുമ്പ് വടികള്‍ എന്നിവ പിടിച്ചെടുത്തു. റാഷിദിനെ ഫോണില്‍ വിളിച്ച് ഉടന്‍ കാണണമെന്ന് ആവശ്യപ്പെട്ടാണ് റഹീം മറ്റുള്ളവരുമായി നാദാപുരത്തെത്തിയത്. ഫോണ്‍മുഖാന്തിരം വിളിച്ചു വരുത്തി വാഹനത്തില്‍ തട്ടിക്കൊണ്ടുപോയി വധിക്കാനായിരുന്നു സംഘത്തിന്റെ പദ്ധതിയെന്ന് പൊലിസ് പറയുന്നു.
ഇതിനായി കഴിഞ്ഞ ദിവസം വൈകുന്നേരമാണ് നാദാപുരത്ത് ടൂറിസ്റ്റ് സര്‍വിസ് നടത്തുന്ന സ്വകാര്യ വാഹനം സംഘം വാടകക്കെടുത്തത്. നേരത്തെ എളയടം ഭാഗങ്ങളില്‍ നടന്ന നിരവധി അക്രമസംഭവങ്ങളില്‍ പ്രതികളാണ് പിടിയിലായ മൂന്നുപേരും.  നാദാപുരം കോടതിയില്‍ ഹാജരാക്കിയ പ്രതികളെ 14 ദിവസത്തേക്ക് റിമാന്‍ഡ് ചെയ്തു.