മട്ടന്നൂര്‍: വ്യാപാരിയുടെ വീട് കുത്തിതുറന്ന് സ്വര്‍ണാഭരണവും പണവും കവര്‍ന്ന സംഭവത്തില്‍ യുവാവ് പിടിയില്‍. ചെക്കിക്കുളത്തെ കെ.വി അബ്ദുല്‍ റഹീമിനെ(24) ആണ് സി.ഐ ഷജു ജോസഫ്, എസ്.ഐ എ.വി ദിനേശ് എന്നിവര്‍ ചേര്‍ന്ന് അറസ്റ്റുചെയ്തത്.
മട്ടന്നൂര്‍ മഹാദേവ ക്ഷേത്രം റോഡിലെ പൂകച്ചവടക്കാരന്‍ ഇന്ദിരാനഗറിലെ സി. രഘുനാഥിന്റെ രഷില നിവാസിലാണു കഴിഞ്ഞമാസം കവര്‍ച്ച നടത്തിയത്.  കിടപ്പുമുറികളിലെ അലമാരകളിലും മേശകളിലുമായി സൂക്ഷിച്ച നാലുപവന്റെ ആഭരണവും 10,000 രൂപയും മൊബൈല്‍ ഫോണ്‍, വാച്ച് എന്നിവയുമാണു കവര്‍ന്നത്. വീടുപൂട്ടി വീട്ടുകാര്‍ ജോലിക്കുപോയ സമയത്തായിരുന്നു കവര്‍ച്ച. റഹീമിനെതിരേ ജില്ലയിലെ വിവിധ സ്റ്റേഷനുകളില്‍ കവര്‍ച്ചാകേസുകളുണ്ടെന്നു പൊലിസ് അറിയിച്ചു. സിവില്‍ പൊലിസ് ഓഫിസര്‍മാരായ മനോഹരന്‍, സിജു, വിനോദ് എന്നിവരും പ്രതിയെ പിടികൂടിയ സംഘത്തില്‍ ഉണ്ടായിരുന്നു.