തിരുവനന്തപുരം: മലപ്പുറം ലോക്‌സഭാ തെരഞ്ഞെടുപ്പില്‍ എന്‍ ശ്രീപ്രകാശിനെ വീണ്ടും സ്ഥാനാര്‍ഥിയാക്കിയ തീരുമാനം ബി.ജെ.പിയില്‍ ചേരിതിരിവ് സൃഷ്ടിക്കുന്നു.
പാര്‍ട്ടി സംസ്ഥാന ഘടകത്തില്‍ അഭിപ്രായ ഐക്യമുണ്ടാക്കാതെ സംസ്ഥാന പ്രസിഡന്റ് കുമ്മനം രാജശേഖരനടക്കമുള്ള ഏതാനും നേതാക്കളുടെ അഭിപ്രായം മാത്രം കണക്കിലെടുത്താണ് കേന്ദ്ര നേതൃത്വം ശ്രീപ്രകാശിന്റെ സ്ഥാനാര്‍ഥിത്വത്തിന് അംഗീകാരം നല്‍കിയതെന്ന് ഒരു വിഭാഗം നേതാക്കള്‍ പറയുന്നു.

മുതിര്‍ന്ന നേതാവും എം.എല്‍.എയുമായ ഒ രാജഗോപാലിന്റെ അഭിപ്രായം പോലും പരിഗണിക്കപ്പെട്ടില്ലെന്ന് അവര്‍ ആരോപിക്കുന്നു.
മണ്ഡലത്തില്‍ പാര്‍ട്ടി സ്ഥാനാര്‍ഥി വിജയിക്കാന്‍ വിദൂരസാധ്യത പോലും കാണുന്നില്ലെങ്കിലും വോട്ട് വര്‍ധിപ്പിക്കുക എന്ന തന്ത്രം പയറ്റാനാണ് സംസ്ഥാന ഘടകം ലക്ഷ്യമിടുന്നത്. വോട്ട് വര്‍ധന കേന്ദ്രത്തിലെ നരേന്ദ്രമോദി സര്‍ക്കാരിന്റെ നയങ്ങള്‍ക്കുള്ള അംഗീകാരമായി വിലയിരുത്തപ്പെടുമെന്നും അതിനായി പരമാവധി വോട്ട് സമാഹരിക്കാനാവുന്ന ഒരാളെ സ്ഥാനാര്‍ഥിയാക്കണമെന്നുമായിരുന്നു രാജഗോപാല്‍ ഉള്‍പ്പെടെയുള്ള ഒരു വിഭാഗം നേതാക്കളുടെ അഭിപ്രായം.

കഴിഞ്ഞ ലോക്‌സഭാ തെരഞ്ഞെടുപ്പില്‍ ഇവിടെ സ്ഥാനാര്‍ഥിയായിരുന്ന ശ്രീപ്രകാശിനു ലഭിച്ചത് 64,705 വോട്ടാണ്. കഴിഞ്ഞ നിയമസഭാ തെരഞ്ഞെടുപ്പില്‍ ഈ മണ്ഡല പരിധിയില്‍ വരുന്ന നിയമസഭാ മണ്ഡലങ്ങളില്‍ എന്‍.ഡി.എയ്ക്ക് മൊത്തം 70,000ത്തോളം വോട്ട് ലഭിച്ചിരുന്നു. ഈ തെരഞ്ഞെടുപ്പില്‍ അത് ഒരു ലക്ഷത്തോളമാക്കി ഉയര്‍ത്തുക എന്ന ലക്ഷ്യം പാര്‍ട്ടിക്കുണ്ടായിരുന്നു. ഇതിനായി ഒരു സംസ്ഥാന നേതാവിനെ തന്നെ രംഗത്തിറക്കണമെന്ന് രാജഗോപാല്‍ അടക്കമുള്ള നേതാക്കള്‍ നിര്‍ദേശിച്ചിരുന്നു.

അതല്ലെങ്കില്‍ മണ്ഡലത്തിലെ സാമുദായിക ഘടന കണക്കിലെടുത്ത് മുസ്്‌ലിം സമുദായത്തിലെ അറിയപ്പെടുന്ന ഒരാളെ പാര്‍ട്ടി ചിഹ്നത്തില്‍ തന്നെ രംഗത്തിറക്കണമെന്ന നിര്‍ദേശവും ഇവരില്‍ നിന്നുണ്ടായി. അതേസമയം, ശ്രീപ്രകാശിനെ തന്നെ സ്ഥാനാര്‍ഥിയാക്കണമെന്നാണ് കുമ്മനം കേന്ദ്ര നേതൃത്വത്തോട് ആവശ്യപ്പെട്ടതെന്ന് മറുപക്ഷത്തെ നേതാക്കള്‍ പറയുന്നു. വി മുരളീധരന്‍, പി.കെ കൃഷ്ണദാസ് എന്നിവരുടെ പിന്തുണയും ശ്രീപ്രകാശിനു ലഭിച്ചു.

മണ്ഡലത്തില്‍ ഏറ്റവുമധികം വോട്ട് ലഭിക്കാന്‍ സാധ്യതയുള്ളയാള്‍ ശ്രീപ്രകാശ് ആണെന്നാണ് ഈ നേതാക്കള്‍ അഭിപ്രായപ്പെട്ടത്. എന്നാല്‍, ജില്ലയിലെ പാര്‍ട്ടി പ്രവര്‍ത്തകര്‍ക്കിടയില്‍ പഴയ സ്വീകാര്യത ഇപ്പോള്‍ ഇല്ലെന്നും കഴിഞ്ഞ തവണ ലഭിച്ച വോട്ട് നിലനിര്‍ത്താന്‍ പോലും അദ്ദേഹത്തിനാവില്ലെന്നും മറുപക്ഷം പറയുന്നു. വോട്ട് കുറഞ്ഞാല്‍ പാര്‍ട്ടി യു.ഡി.എഫിനെ സഹായിച്ചെന്ന ആരോപണം നേരിടേണ്ടി വരുമെന്ന ആശങ്കയും ഇവര്‍ക്കുണ്ട്.