ചങ്ങരംകുളം:  നന്നംമുക്ക് പഞ്ചായത്തില്‍ കല്ലുര്‍മ സെന്ററില്‍ പ്രവര്‍ത്തിച്ചിരുന്ന കള്ളുഷാപ്പ് വീണ്ടും തുറന്ന്  പ്രവര്‍ത്തിക്കാനുളള ശ്രമം ചങ്ങരംകുളം പൗരസമിതിയും നാട്ടുകാരും ചേര്‍ന്ന് തടഞ്ഞു. രാവിലെ എട്ടിന് ഷാപ്പ് തുറക്കാന്‍ കരാറുകാര്‍ എത്തിയപ്പോള്‍ തുറക്കാനുവദിക്കാതെ പൗരസമിതിയും  നാട്ടുകാരും തടയുകയായിരുന്നു.
പഞ്ചായത്തിന്റെ ഡി ആന്‍ഡ് ഒ ലൈസന്‍സ് ഇല്ലാത്തതിനാല്‍ ഷാപ്പ്  പൂട്ടാന്‍ ഒരു വര്‍ഷം മുമ്പ് ഗ്രാമപഞ്ചായത്ത് ഉത്തരവിട്ടിരുന്നു. അതു പരിഗണിക്കാതെ തുറന്ന്  പ്രവര്‍ത്തിച്ചപ്പോള്‍ പൗരസമിതി ഹൈക്കോടതിയെ സമീപ്പിച്ച് ഷാപ്പ് പൂട്ടാന്‍ ഉത്തരവ് നേടിയിരുന്നു.  തുടര്‍ന്ന് ഷാപ്പ് ആറ് മാസമായി തുറക്കാറില്ലായിരുന്നു. അതിനിടയില്‍ ഹൈക്കോടതി ഉത്തരവ്  മറികടന്ന് ഇന്ന് ഷാപ്പ് തുറക്കുമെന്ന് അറിഞ്ഞ നാട്ടുകാര്‍ പൗരസമിതിയുടെ നേതൃത്വത്തില്‍ സംഘടിച്ച്  ഷാപ്പ് ഉപരോധിക്കുകയായിരുന്നു. സംഘര്‍ഷ സാധ്യത കണക്കിലെടുത്ത് പൊലിസെത്തി ഇരുവിഭാഗവുമായും സംസാരിക്കുകയും ഉത്തരവുകള്‍ പരിശോധിക്കുകയും ചെയ്തു. നിലവിലെ  ഹൈക്കോടതി ഉത്തരവ് റദ്ദാക്കുന്ന ഉത്തരവും പഞ്ചായത്തിന്റെ ലൈസന്‍സും ഇല്ലാതെ തുറക്കരുതെന്ന  തീരുമാനത്തില്‍ ഉപരോധസത്യഗ്രഹം അവസാനിപ്പിച്ചു. മുജീബ് കോക്കൂര്‍, അലിമോന്‍ നരണിപ്പുഴ,  അഷ്‌റഫ് കാട്ടില്‍, നൗഫല്‍ സഅദി, കെ അനസ്, കെ.സി അലി, സുരേഷ് ആലംകോട്, പി.എം  നൂരുദ്ദീന്‍, സധു കല്ലുര്‍മ്മ സംസാരിച്ചു. ഹൈക്കോടതിയുടെയും ഗ്രാമപഞ്ചായത്തിന്റെയും ഉത്തരവ്  ലംഘിച്ചു പൊതുജനത്തിനു ശല്യമായ ഷാപ്പ് പിന്‍വാതിലിലൂടെ തുറക്കാനുളള ശ്രമത്തിനെതിരേ  കോടതിയലക്ഷ്യത്തിന് ഹൈക്കോടതിയില്‍ കേസ് നല്‍കുമെന്ന് പൗരസമിതി ഭാരവാഹികള്‍ പറഞ്ഞു.