മാനന്തവാടി: സംസ്ഥാനത്തെ വസ്ത്ര നിര്‍മാണ മേഖല പ്രതിസന്ധിയിലാണെന്നും ഈ മേഖലയെ രക്ഷിക്കാന്‍ ശക്തമായ നടപടികള്‍ സ്വീകരിക്കുമെന്നും വ്യവസായ-സ്‌പോര്‍ട്‌സ് മന്ത്രി എ.സി മൊയ്തീന്‍ അറിയിച്ചു. തൃശ്ശിലേരിയിലെ വയനാട് ഹാന്റ്‌ലൂം പവര്‍ലൂം ആന്‍ഡ് മള്‍ട്ടിപര്‍പ്പസ് ഇന്‍ഡസ്ട്രിയല്‍ സഹകരണ സംഘം സന്ദര്‍ശിച്ച് സംസാരിക്കുകയായിരുന്നു അദ്ദേഹം. ടെക്സ്റ്റയില്‍ മേഖലയുമായി ബന്ധപ്പെട്ട് പ്രത്യക്ഷമായും പരോക്ഷമായും ആയിരക്കണക്കിനാളുകള്‍ തൊഴിലെടുക്കുന്നുണ്ട്. അതുകൊണ്ടുതന്നെ ഈ മേഖലയുടെ പരിരക്ഷയ്ക്ക് സര്‍ക്കാര്‍ മുന്തിയ പരിഗണന നല്‍കും. വയനാട് ഹാന്റ്‌ലൂം പവര്‍ലൂം ആന്‍ഡ് മള്‍ട്ടി പര്‍പ്പസ് ഇന്‍ഡസ്ട്രിയല്‍ സഹകരണ സംഘത്തിന്റെ നവീകരണവുമായി ബന്ധപ്പെട്ട് ലഭിച്ച നിവേദനം സമഗ്രമായി പഠിച്ച് പരിഹാര നടപടി സ്വീകരിക്കും. ഇക്കാര്യം പരിശോധിക്കാന്‍ ജില്ലാ വ്യവസായ കേന്ദ്രം ജനറല്‍ മാനേജറെ ചുമതലപ്പെടുത്തിയിട്ടുണ്ടെന്നും മന്ത്രി അറിയിച്ചു. ഇതോടനുബന്ധിച്ച് നടന്ന ചടങ്ങില്‍ ഒ.ആര്‍ കേളു എം.എല്‍.എ. അധ്യക്ഷനായി. സംഘം പ്രസിഡന്റ് പി.ജെ ആന്റണി, തിരുനെല്ലി ഗ്രാമപഞ്ചായത്ത് പ്രസിഡന്റ് മായാദേവി, പൂതാടി ഗ്രാമപഞ്ചായത്ത് പ്രസിഡന്റ് രുഗ്മിണി സുബ്രഹ്മണ്യന്‍, ജില്ലാ വ്യവസായകേന്ദ്രം ജനറല്‍ മാനേജര്‍ ഇ സലാഹുദ്ദീന്‍ സംസാരിച്ചു.