മണ്ണാര്‍ക്കാട്: പതിയാത്ത മെഷീനും, കയറാത്ത ആധാര്‍ രേഖകളുമായി റേഷന്‍ കടയും, സിവില്‍ സപ്ലൈ ഓഫിസും കയറിയിറങ്ങി റേഷന്‍ ഗുണഭോക്താക്കള്‍ വലയുന്നു. റേഷന്‍ ആനുകൂല്യം യഥാര്‍ത്ഥ ഗുണഭോക്താവിന് തന്നെ ലഭിക്കണമെന്ന ലക്ഷ്യത്തോടെ തുടങ്ങിയ ഇ - പോസ് സംവിധാനം ഡീലര്‍മാര്‍ സര്‍ക്കാര്‍ സംവിധാനത്തെ അട്ടിമറിക്കാനുളള ശ്രമമാണെന്ന ആരോപണവും ഇതോടെ ശക്തമായിട്ടുണ്ട്.
അരി ലഭിക്കുന്നതിന് കാത്തിരുന്ന് മണിക്കൂറുകളോളം വരിയില്‍ നിന്ന് തനിക്കുളള അവസരമെത്തുമ്പോള്‍ ആധാര്‍ ബന്ധിപ്പിച്ചില്ലെന്ന മറുപടിയാണ് ലഭിക്കുന്നതെന്ന പരാതി വ്യാപകമാണ്. ഇനി ആധാര്‍ ബന്ധിപ്പിച്ചവരാവട്ടെ അവരുടെ വിരലുകളുടെ അടയാളം പതിയുന്നില്ലെന്നും പറഞ്ഞും ഗുണഭോക്താക്കള്‍ ദിനം പ്രതി റേഷന്‍ കടകളില്‍ നിന്ന് മടങ്ങേണ്ടി വരുന്നുമുണ്ട്.
തുടര്‍ന്ന് ഒരു വിഭാഗം വീണ്ടും ആധാറിന്റെയും, റേഷന്‍ കാര്‍ഡിന്റെയും പകര്‍പ്പെടുത്ത് സപ്ലൈ ഓഫിസുകള്‍ കയറുമ്പോള്‍, ചിലര്‍ ആധാറില്‍ ബയോമെട്രിക് അപ്‌ഡേഷന്‍ ചെയ്യാനുമുളള പെടാപാടിലുമാണ്. എന്നാല്‍ റേഷന്‍ കാര്‍ഡില്‍ ആധാര്‍ നമ്പര്‍ കയറിട്ടില്ലെന്ന് പറഞ്ഞ് കഴിഞ്ഞ മാസം സപ്ലൈ ഓഫീസില്‍ സമര്‍പ്പിച്ച അപേക്ഷകള്‍ ഇപ്പോഴും ആധാറുമായി പേര് ബന്ധിപ്പിച്ചിട്ടില്ല. ഇതു കാരണം ഈ മാസവും നരവധി പേര്‍ക്ക് റേഷന്‍ ആനുകൂല്യം ലഭിക്കാനിടയില്ല.
ആധാര്‍ ബന്ധിപ്പിക്കാന്‍ സപ്ലൈ ഓഫീസില്‍ ലഭിച്ച അപേക്ഷകള്‍ കുന്നുകൂടി കിടക്കുക എന്നല്ലാതെ റേഷന്‍ കാര്‍ഡിലെ പേരുമായി ആധാര്‍ നമ്പര്‍ ബന്ധിപ്പിക്കാന്‍ അധികൃതര്‍ നടപടിയെടുക്കാത്തതില്‍ ജനം പ്രതിഷേധത്തിലാണ്. ഗുണഭോക്താക്കള്‍ നാലോളം തവണ റേഷന്‍ കാര്‍ഡിന്റെയും ആധാറിന്റെയും പകര്‍പ്പ് റേഷന്‍ കടകളിലും സപ്ലൈ ഓഫിസിലുമായി നല്‍കിയിട്ടുണ്ടെന്നാണ് ഗുണഭോക്താക്കള്‍ പറയുന്നത്. ഇന്റര്‍നെറ്റിന്റെ തകരാറാണ് ചില ഭാഗങ്ങളില്‍ പ്രശ്‌നമായി പറയുന്നതെങ്കില്‍ ചിലയിടത്ത് ഇ - പോസ് മെഷീന്‍ നല്‍കുന്ന സ്ലിപ്പ് പോലും ലഭിക്കുന്നില്ലെന്ന പരാതിയാണ് ഗുണഭോക്താക്കള്‍ക്കുളളത്. വെബ്‌സൈറ്റ് സെര്‍വറിന്റെ വേഗതക്കുറവും ഇ - പോസ് മെഷീന്റെ പ്രവര്‍ത്തനത്തെ സാരമായി ബാധിക്കുന്നുണ്ട്.
മണ്ണാര്‍ക്കാട് താലൂക്കിലെ പല ഭാഗങ്ങളിലും മെയ് മൂന്നാം വാരത്തിലെത്തിയിട്ടും ഈ മാസത്തെ റേഷന്‍ വിതരണം നടന്നിട്ടില്ല. ഗുണഭോക്താക്കള്‍ പലരും ദിവസവും റേഷന്‍ കടകളില്‍ വന്ന് മടങ്ങുന്നതും നിത്യ സംഭവമായി മാറിയിട്ടുണ്ട്.