തൂത്തുക്കുടി: വേദാന്ത കമ്പനിക്കെതിരായ സമരം ശക്തമാക്കുമെന്ന് നാട്ടുകാര്‍. സമരം രക്തരൂക്ഷിതമായിട്ടും പിന്നോട്ടില്ലെന്നാണ് പ്രക്ഷോഭകര്‍ പറയുന്നത്. സമരം പൊളിക്കാനാണ് വെടിവയ്പ്പ് നടത്തിയതെന്ന ആരോപണവും അവര്‍ ഉന്നയിക്കുന്നുണ്ട്.തങ്ങളുടെ ആവശ്യം അംഗീകരിക്കുന്നത് വരെ കൊല്ലപ്പെട്ടവരുടെ മൃതദേഹങ്ങള്‍ ഏറ്റുവാങ്ങില്ലെന്ന് ബന്ധുക്കള്‍ പറഞ്ഞു.
വേദാന്ത കമ്പനിയുടെ സ്റ്റെര്‍ലൈറ്റ് പ്ലാന്റ് അടച്ചുപൂട്ടിയാല്‍ മാത്രമേ മൃതദേഹങ്ങള്‍ സംസ്‌കരിക്കൂവെന്നും അവര്‍ വ്യക്തമാക്കി. വെടിയേറ്റ് മരിച്ചവരുടെ മൃതദേഹങ്ങള്‍ ആറംഗ ഡോക്ടര്‍മാരാണ് പരിശോധിച്ചത്. നാല് ജഡ്ജിമാരുടെ മേല്‍നോട്ടത്തിലായിരുന്നു പരിശോധന. വെടിവയ്പിനെ കുറിച്ച് അന്വേഷിക്കാന്‍ വിരമിച്ച ജഡ്ജി അരുണ ജഗദീഷന്റെ നേതൃത്വത്തിലുള്ള സംഘത്തെയാണ് സര്‍ക്കാര്‍ നിയോഗിച്ചിരിക്കുന്നത്.
സംഭവത്തില്‍ മിക്ക നേതാക്കളും സംശയം പ്രകടിപ്പിക്കുന്നുണ്ട്. അതേസമയം 11 പേര്‍ കൊല്ലപ്പെടാനിടയായ സംഭവത്തില്‍ വിശദീകരണം തേടി ദേശീയ മനുഷ്യാവകാശ കമ്മിഷന്‍ തമിഴ്‌നാട് സര്‍ക്കാരിന്് നോട്ടീസയച്ചു.
രണ്ടാഴ്ചക്കകം വ്യക്തമായ വിവരങ്ങളടങ്ങിയ റിപ്പോര്‍ട്ട് സമര്‍പ്പിക്കണമെന്നാവശ്യപ്പെട്ട് തമിഴ്‌നാട് ചീഫ് സെക്രട്ടറി, ഡി.ജി.പി എന്നിവര്‍ക്കാണ് നോട്ടീസ അയച്ചത്.