ന്യൂഡല്‍ഹി: എയര്‍ ഇന്ത്യാ ജീവനക്കാരനെ മര്‍ദിച്ച ശിവസേന എം.പി രവീന്ദ്ര ഗെയ്ക്ക്‌വാദിന് മുന്നറിയിപ്പുമായി പാര്‍ട്ടി അധ്യക്ഷന്‍ ഉദ്ധവ് താക്കറെ. ഇത്തരം വിഷയങ്ങള്‍ വച്ചു പൊറുപ്പിക്കില്ലെന്ന് ഉദ്ധവ് വ്യക്തമാക്കി. വിഷയത്തെ പാര്‍ട്ടി ഗൗരവത്തോടെയാണ് കാണുന്നതെന്നും ഉദ്ധവ് പറഞ്ഞു. സംഭവത്തില്‍ ഗെയ്ക്ക്‌വാദിനോട് അദ്ദേഹം വിശദീകരണം ആവശ്യപ്പെട്ടിട്ടുണ്ട്.
അക്രമത്തെ ഒരു തരത്തിലും പാര്‍ട്ടി പ്രോത്സാഹിപ്പിക്കില്ല. ഗെയ്ക്ക്‌വാദിന്റെ നടപടി പാര്‍ട്ടിക്ക് നാണക്കേടുണ്ടാക്കിയെന്നും ഉദ്ധവ് പറഞ്ഞു. ഇന്നലെ രാവിലെ ഉദ്ധവുമായി ഗെയ്ക്ക്‌വാദ് കൂടിക്കാഴ്ച്ച നടത്തുമെന്ന് സൂചനയുണ്ടായിരുന്നു. എന്നാല്‍ പ്രസ്താവനയെ തുടര്‍ന്ന് കൂടിക്കാഴ്ച്ച ഒഴിവാക്കുകയായിരുന്നു. നേരത്തെ പാര്‍ട്ടിയിലെ മുതിര്‍ന്ന നേതാവായ സഞ്ചയ് റൗട്ട് ഗെയ്ക്ക്‌വാദിനെ ന്യായീകരിച്ചിരുന്നു.
അദ്ദേഹത്തിന്റെ നടപടിയില്‍ അസ്വാഭാവികതയൊന്നുമില്ലെന്നും റൗട്ട് പറഞ്ഞു. ഗെയ്ക്ക്‌വാദ് ബിസിനസ് ക്ലാസ് ബുക്ക് ചെയ്തിട്ടും ഇക്കണോമിക് ക്ലാസില്‍ ഇരിക്കാന്‍ എയര്‍ ഇന്ത്യാ ജീവനക്കാര്‍ നിര്‍ബന്ധിക്കുകയായിരുന്നു. ഇതേ തുടര്‍ന്നാണ് അദ്ദേഹം ജീവനക്കാരനെ മര്‍ദിച്ചത്. അക്രമത്തിന് പ്രേരിപ്പിച്ചത് എയര്‍ ഇന്ത്യയാണെന്നും റൗട്ട് ആരോപിച്ചു. എന്നാല്‍ പാര്‍ട്ടിയിലെ മറ്റുള്ള നേതാക്കളെല്ലാം ഗെയ്ക്ക്‌വാദിനെ തള്ളിപറഞ്ഞിട്ടുണ്ട്.