ഏഴിമല (കണ്ണൂര്‍): ഏഴിമല നാവിക അക്കാദമിയില്‍ പരിശീലനം പൂര്‍ത്തിയാക്കിയ കേഡറ്റുകളുടെ പാസിങ് ഔട്ട് പരേഡ് നടന്നു. 311 കേഡറ്റുകളുടെ പാസിങ് ഔട്ട് പരേഡാണ് ഇന്നലെ നടന്നത്. ദക്ഷിണമേഖലാ നാവിക കമാന്‍ഡന്റ് വൈസ് അഡ്മിറല്‍ എ.ആര്‍ കാര്‍വെ പരേഡില്‍ സല്യൂട്ട് സ്വീകരിച്ചു.
സേവനത്തിനിടയില്‍ ധൈര്യത്തോടെ നീങ്ങാന്‍ കേഡറ്റുകള്‍ തയാറാകണമെന്ന് അദ്ദേഹം പറഞ്ഞു. പ്രതികൂല സാഹചര്യം നേരിടാന്‍ ഇന്ത്യന്‍ നാവികസേന സജ്ജമാണ്. ഏഴിമല നാവിക അക്കാദമിയുടെ മൂന്നാംഘട്ട വികസനം വേഗത്തിലാക്കുമെന്നും കാര്‍വെ പറഞ്ഞു. മികച്ച കേഡറ്റുകള്‍ക്കുള്ള രാഷ്ട്രപതിയുടെ സ്വര്‍ണമെഡലും അദ്ദേഹം സമ്മാനിച്ചു.
നാഷനല്‍ അക്രഡിറ്റേഷന്‍ ബോര്‍ഡ് ചെയര്‍മാന്‍ പ്രൊഫ. സുരേന്ദ്രപ്രസാദ്, കമാന്‍ഡന്റ് വൈസ് അഡ്മിറല്‍ ആര്‍.ബി പണ്ഡിറ്റ്, മുതിര്‍ന്ന ഉദ്യോഗസ്ഥര്‍, കേഡറ്റുകളുടെ കുടുംബാംഗങ്ങള്‍ എന്നിവര്‍ പങ്കെടുത്തു.