അപകടത്തില്‍പ്പെട്ടത് ഹോങ്കോങ്ങിലെ ഏറ്റവും വലിയ യന്ത്രഗോവണി
ബെയ്ജിങ്: ഹോങ്കോങ്ങിലെ ഷോപ്പിങ് മാളില്‍ യന്ത്രഗോവണി തകര്‍ന്ന് 17 പേര്‍ക്ക് പരുക്കേറ്റു. ഇതില്‍14 പേര്‍ സ്ത്രീകളാണ്. ഹോങ്കോങ്ങിലെ ഏറ്റവും നീളം കൂടിയ യന്ത്രഗോവണിയാണ് അപകടത്തില്‍പ്പെട്ടത്. നയന്ത്രഗോവണിയുടെ വേഗത പെട്ടെന്ന് കൂടുകയും പിന്നീട് നിശ്ചലമാകുകയും ചെയ്തതാണ് അപകടത്തിന് കാരണം. ലെഗാം പാലസിലെ മോങ് കോക്കിലാണ് അപകടമുണ്ടായ മാള്‍.
45 മീറ്ററാണ് ഗോവണിയുടെ നീളം. പെട്ടെന്ന് എതിര്‍ദിശയില്‍ വേഗത്തില്‍ പ്രവര്‍ത്തിച്ചതോടെ ആളുകള്‍ തെറിച്ചുവീണു. മുന്നറിയിപ്പില്ലാതെയാണ് യന്ത്രഗോവണി എതിര്‍ദിശയില്‍ പ്രവര്‍ത്തിച്ചത്. പരുക്കേറ്റവരില്‍ ഒരാളുടെ നില ഗുരുതരമാണ്. തലയ്ക്കു പരുക്കേറ്റ ഇയാളെ ആശുപത്രിയില്‍ പ്രവേശിപ്പിച്ചുവെന്ന് പൊലിസ് വക്താവ് പറഞ്ഞു.
സാധാരണ പ്രവര്‍ത്തിക്കുന്നതിന്റെ രണ്ടിരട്ടി വേഗത്തിലാണ് യന്ത്രഗോവണി പ്രവര്‍ത്തിച്ചതെന്ന് രക്ഷപ്പെട്ടവര്‍ പറഞ്ഞു.