തിരുവനന്തപുരം: ധനകാര്യ കമ്മിഷന്‍ അവാര്‍ഡ് സംബന്ധിച്ച് ചര്‍ച്ച നടത്താന്‍ പതിനഞ്ചാം ധനകാര്യ കമ്മിഷന്‍ ചെയര്‍മാനും സംഘവും കേരളത്തിലെത്തി. രാവിലെ തിരുവനന്തപുരം വിമാനത്താവളത്തിലെത്തിയ ചെയര്‍മാന്‍ എന്‍.കെ സിങിനെയും സംഘത്തെയും ധനകാര്യമന്ത്രി ഡോ.ടി.എം തോമസ് ഐസക് സ്വീകരിച്ചു. തുടര്‍ന്ന് ഗസ്റ്റ് ഹൗസില്‍ നടന്ന ആദ്യദിവസ ചര്‍ച്ചയില്‍ തദ്ദേശ സ്വയംഭരണ സ്ഥാപനങ്ങളുടെ പ്രതിനിധികളാണ് പങ്കെടുത്തത്.
തദ്ദേശസ്ഥാപനങ്ങളുടെ വര്‍ധിച്ച ഉത്തരവാദിത്തങ്ങളും ധനത്തിന്റെ ആവശ്യകതയും കേരളത്തിലെ അധികാര വികേന്ദ്രീകരണത്തിന്റെ സ്വഭാവവും സംബന്ധിച്ച് ഭരണവകുപ്പ് സെക്രട്ടറി ടി.കെ ജോസ് വിശദീകരിച്ചു.തദ്ദേശ സ്ഥാപനങ്ങളെ പ്രതിനിധീകരിച്ച് തിരുവനന്തപുരം ജില്ലാ പഞ്ചായത്ത് പ്രസിഡന്റ് വി.കെ മധു, പഞ്ചായത്ത് അസോസിയേഷന്‍ പ്രസിഡന്റ് അഡ്വ. തുളസിഭായി പത്മനാഭന്‍, ബ്ലോക്ക് പഞ്ചായത്ത് അസോസിയേഷന്‍ പ്രസിഡന്റ് ആര്‍. സുഭാഷ് എന്നിവര്‍ കമ്മിഷനുമായി ചര്‍ച്ച നടത്തി. നഗരപ്രദേശങ്ങളിലെ സ്ഥാപനങ്ങളെ പ്രതിനിധീകരിച്ച് തിരുവനന്തപുരം മേയര്‍ അഡ്വ. വി.കെ പ്രശാന്ത്, കോഴിക്കോട് ഡെപ്യൂട്ടി മേയര്‍ മീരാ ദര്‍ശക്, മുനിസിപ്പല്‍ ചെയര്‍മാന്‍മാരുടെ ചേംബറിനുവേണ്ടി ഡബ്ല്യു.ആര്‍ ഹീബ പങ്കെടുത്തു.
സംസ്ഥാന സര്‍ക്കാരിന്റെ ധനകാര്യ മെമ്മോറാണ്ടം ഇന്ന് തൈക്കാട് ഗസ്റ്റ് ഹൗസില്‍ വച്ച് കമ്മിഷന് കൈമാറും. മുഖ്യമന്ത്രി പിണറായി വിജയന്‍ ആമുഖ അവതരണം നടത്തും. ധനകാര്യ സെക്രട്ടറി മനോജ് ജോഷി ധനകാര്യ മെമ്മോറാണ്ടം സംബന്ധിച്ച വിശദീകരിക്കും. മന്ത്രിമാര്‍, ബന്ധപ്പെട്ട സെക്രട്ടറിമാര്‍, പ്ലാനിങ് ബോര്‍ഡ് വൈസ് ചെയര്‍മാന്‍, അംഗങ്ങള്‍ എന്നിവര്‍ സംബന്ധിക്കും. ധനകാര്യ മന്ത്രി ഡോ. ടി.എം തോമസ് ഐസക് അധ്യക്ഷനായ കമ്മിറ്റിയാണ് മെമ്മോറാണ്ടം തയാറാക്കിയിട്ടുള്ളത്.
ഉച്ചയ്ക്കു ശേഷം രാഷ്ട്രീയകക്ഷി പ്രതിനിധികള്‍, വാണിജ്യ വ്യവസായ സംഘടനകള്‍ എന്നിവയുടെ പ്രതിനിധികളുമായും കമ്മിഷന്‍ ചര്‍ച്ച നടത്തും. നാളെ കമ്മിഷന്‍ എറണാകുളം, തൃശൂര്‍ ജില്ലകളിലെ തദ്ദേശ സ്വയംഭരണ സ്ഥാപനങ്ങളും കൊച്ചി മെട്രോയും സന്ദര്‍ശിക്കും.