പാവറട്ടി: കാസര്‍കോഡ് പഴയചുരിക്കടുത്ത് മദ്‌റസ അധ്യാപകനെ വെട്ടിക്കൊലപ്പെടുത്തിയതിലെ ഗൂഢാലോചന ശക്തമായ അന്വേഷണത്തിലൂടെ പുറത്ത് കൊണ്ടുവരണമെന്ന് എസ്.വൈ.എസ് മണലൂര്‍ നിയോജക മണ്ഡലം കമ്മിറ്റി സര്‍ക്കാരിനോടാവശ്യപ്പെട്ടു. പാവറട്ടിയില്‍ നടന്ന എസ്.വൈ.എസ് മണ്ഡലം കമ്മിറ്റി യോഗത്തില്‍ പ്രസിഡന്റ് മൊയ്തീന്‍കുട്ടി മുസ്‌ലിയാര്‍ അധ്യക്ഷനായി.
യുവതയുടെ മുന്നേറ്റം - കാലത്തിന്റെ കരുത്ത് എന്നപ്രമേയവുമായി എസ്.വൈ.എസ് തൃശൂര്‍ ജില്ലാ കമ്മിറ്റി നടത്തുന്ന പ്രചരണ കാംപയിന്റെ ഭാഗമായി മണ്ഡലം കണ്‍വന്‍ഷന്‍ ഏപ്രില്‍ 12 ന് പാവറട്ടിയില്‍ നടത്താന്‍ തീരുമാനിച്ചു. കണ്‍വന്‍ഷനില്‍ എസ്.വൈ.എസ് സംസ്ഥാന സെക്രട്ടറി നാസര്‍ ഫൈസി കൂടത്തായി മുഖ്യപ്രഭാഷണം നടത്തും.
എസ്.വൈ.എസ് ജില്ലാ പ്രസിഡന്റ് എന്‍.പി അബ്ദുല്‍കരീം ഫൈസി യോഗം ഉദ്ഘാടനം ചെയ്തു. എന്‍.കെ അബ്ദുല്‍ഖാദര്‍ മാസ്റ്റര്‍, ആര്‍.ഇ നാസര്‍, ഉമര്‍ ചക്കനാത്ത്, പി.കെ അഹമ്മദ്, മൊയ്തുണ്ണി ഹാജി തൈക്കാട്, അബ്ദുല്‍ അസീസ്, ഷെരീഫ് ചിറയ്ക്കല്‍, ഷെഫീഖ് വെന്മേനാട്, എന്‍.കെ.ഉമര്‍, എന്‍.എം. ഹമീദ്, കെ.കെ.അബ്ദുല്‍ഹമീദ് സംസാരിച്ചു.