റിയാദ്: സംഘര്‍ഷം രൂക്ഷമായ യമനില്‍ നിന്നു വിമത വിഭാഗമായ ഇറാന്‍ അനുകൂല ഹൂതി മലീഷികള്‍ സഊദിയെ ലക്ഷ്യമാക്കി ആക്രമണം ശക്തമാക്കി. അതിര്‍ത്തി പ്രദേശങ്ങളിലെ പട്ടണങ്ങളെ ലക്ഷ്യമാക്കി ഹൂതികള്‍ നാലു ബാലിസ്റ്റിക് മിസൈലുകള്‍ അയച്ചതായും ആകാശത്തു വെച്ചു തന്നെ അവ സഊദി അതിര്‍ത്തി രക്ഷാ സേന തകര്‍ത്തതായും സൗഊദി മാധ്യമങ്ങള്‍ റിപ്പോര്‍ട്ട് ചെയതു.

അബഹ, ഖമീസ് മുശൈത്ത് എന്നീ നഗരങ്ങളിലേക്കാണ് മിസൈല്‍ ലക്ഷ്യം വെച്ച് തൊടുത്തുവിട്ടത്. എന്നാല്‍, ലക്ഷ്യസ്ഥാനം എത്തുന്നതിനു മുന്‍പ് തന്നെ അവ സഊദി അതിര്‍ത്തിസേന മിസൈല്‍ വേധ ഉപകരണം കൊണ്ട് തകര്‍ക്കുകയായിരുന്നു. ആക്രമണത്തില്‍ നാശനഷ്ടങ്ങള്‍ റിപ്പോര്‍ട്ട് ചെയ്യപ്പെട്ടിട്ടില്ല.