തവനൂര്‍: ആതുര സേവനം ആത്മീയ സാധനയാണെന്ന് തവനൂര്‍ കമ്യൂനിറ്റി ഹെല്‍ത്ത് സെന്റര്‍ ചീഫ് മെഡിക്കല്‍ ഓഫീസര്‍ ഡോ: സജി എന്‍.ആര്‍.പറഞ്ഞു. ദേശീയ ഡോക്ടേഴ്‌സ് ദിനാചരണത്തിന്റെ ഭാഗമായി നാഷണല്‍ സര്‍വീസ് സ്‌കീം കടകശ്ശേരി ഐഡിയല്‍ കോളജ് യൂനിറ്റ് സംഘടിപ്പിച്ച ആരോഗ്യ സെമിനാറില്‍ വിഷയമവതരിപ്പിച്ച് സംസാരിക്കുകയായിരുന്നു അദ്ദേഹം. തവനൂര്‍ കമ്യൂനിറ്റി ഹെല്‍ത്ത് സെന്റര്‍ കോണ്‍ഫ്രന്‍സ് ഹാളില്‍ നടന്ന സെമിനാര്‍ പൊന്നാനി ബ്ലോക്ക് പഞ്ചായത്ത് പ്രസിഡന്റ് കെ.ലക്ഷ്മി ഉദ്ഘാടനം ചെയ്തു. ഡോ: സൗമ്യ. കെ, ഡോ: അലി അഫ്‌സല്‍, ഡോ: സബീന, ഡോ: മുഹമ്മദ് ശഫീഖ്,വാര്‍ഡ് മെമ്പര്‍ ഹസൈനാര്‍ ഹാജി, ഐഡിയല്‍ സ്‌കൂള്‍ സീനിയര്‍ പ്രിന്‍സിപ്പല്‍ വി.ടി ജോസഫ് പ്രസംഗിച്ചു. സി.എച്ച്.സി യിലെ വിവിധ വിഭാഗങ്ങളിലെ ഡോക്ടര്‍മാരെ പ്രത്യേക ഉപഹാരങ്ങള്‍ നല്‍കി ആദരിച്ചു. എന്‍.എസ്.എസ് വളണ്ടിയര്‍മാര്‍ക്കു പുറമേ ഹെല്‍ത്ത് സൂപ്പര്‍വൈസര്‍, ഹെല്‍ത്ത് ഇന്‍സ്‌പെക്ടര്‍, തവനൂര്‍ പഞ്ചായത്ത് ആരോഗ്യ പ്രവര്‍ത്തകര്‍ തുടങ്ങിയവരും ചടങ്ങില്‍ സംബന്ധിച്ചു. കോളേജ് പ്രിന്‍സിപ്പല്‍ പ്രൊഫ: കോയക്കുട്ടി അദ്ധ്യക്ഷത വഹിച്ചു. പ്രോഗ്രാം ഓഫീസര്‍ യാക്കൂബ് പൈലിപ്പുറം സ്വാഗതവും വളണ്ടിയര്‍ കണ്‍വീനര്‍ ആലിയ. പി നന്ദിയും പറഞ്ഞു.