പയ്യാവൂര്‍ (കണ്ണൂര്‍): ചതിരംപുഴയില്‍ കാര്‍ കലുങ്കിന്റെ സംരക്ഷണ ഭിത്തിയില്‍ ഇടിച്ച് രണ്ട് വിദ്യാര്‍ഥികള്‍ മരിച്ചു. വെട്ടത്ത് ജോണി- റജീന ദമ്പതികളുടെ മകന്‍ റിജുല്‍ ജോണി (19), കുരുവിലങ്ങാട്ട് ജോയി- ജാന്‍സി ദമ്പതികളുടെ മകന്‍ അനൂപ് ജോയി (19) എന്നിവരാണ് മരിച്ചത്.
കാറിന്റെ പിന്‍സീറ്റിലാണ് ഇവര്‍ ഇരുന്നത്. കാര്‍ ഓടിച്ചിരുന്ന മച്ചികാട്ട് തോമസിന്റെ മകന്‍ അഖില്‍ (19), വരമ്പകത്ത് സാജുവിന്റെ മകന്‍ സില്‍ജോ (19) എന്നിവര്‍ അത്ഭുതകരമായി രക്ഷപ്പെട്ടു. അഖില്‍ പരിയാരം മെഡിക്കല്‍ കോളജിലും സില്‍ജോ മംഗളൂരു തേജസ്വിനി ആശുപത്രിയിലെ തീവ്രപരിചരണ വിഭാഗത്തിലും ചികിത്സയിലാണ്. നാലുപേരും ചന്ദനക്കാംപാറ സ്വദേശികളും സുഹൃത്തുക്കളുമാണ്.
ഇന്നലെ രാവിലെ 7.40നാണ് നാടിനെ നടുക്കിയ സംഭവം. ചന്ദനക്കാംപാറ ചെറുപുഷ്പ ദേവാലയത്തില്‍നിന്ന് കുര്‍ബാന കഴിഞ്ഞ് പൈസക്കരിയിലേക്ക് പോകവെ ചതിരംപുഴ ടൗണിനു സമീപം നിയന്ത്രണംവിട്ട മാരുതി സ്വിഫ്റ്റ് ഡിസയര്‍ കാര്‍ കലുങ്കിന്റെ സംരക്ഷണ ഭിത്തിയില്‍ ഇടിച്ച് രണ്ടായി പിളര്‍ന്ന് പിന്‍ഭാഗം കലുങ്കില്‍ നിന്ന് തോട്ടിലേക്ക് വീണ് കത്തി അമരുകയായിരുന്നു.
കത്തിക്കരിഞ്ഞ അനൂപിന്റെ മൃതശരീരം ഇരിട്ടിയില്‍ നിന്നുവന്ന അഗ്‌നിശമനസേനയും പയ്യാവൂര്‍ പൊലിസും ഏറെ പണിപ്പെട്ടാണ് പുറത്തെടുത്തത്. ഇടിയുടെ ആഘാതത്തില്‍ പിന്‍സീറ്റിലിരുന്ന റിജുല്‍ ജോണി റോഡിലേക്ക് തെറിച്ചുവീണ് തല്‍ക്ഷണം മരിച്ചു.
മരിച്ച റിജുല്‍ രാമപുരം മാര്‍ അഗസ്തിനോസ് കോളജില്‍ ഇലക്ട്രോണിക്‌സ് ആന്‍ഡ് കംപ്യൂട്ടര്‍ സയന്‍സ് രണ്ടാംവര്‍ഷ വിദ്യാര്‍ഥിയാണ്. സഹോദരങ്ങള്‍: റിജോ, മരിയ. അനൂപ് ബംഗളൂരു ക്രിസ്തു ജയന്തി കോളജില്‍ ബികോം രണ്ടാംവര്‍ഷ വിദ്യാര്‍ഥിയാണ്. സഹോദരങ്ങള്‍: അഭിലാഷ്, ആകര്‍ഷ്. ഇരുവരുടെയും മൃതദേഹം ഇന്ന് ഉച്ചകഴിഞ്ഞ് രണ്ടിന് ചന്ദനക്കാംപാറ ചെറുപുഷ്പ ദേവാലയത്തില്‍ സംസ്‌കരിക്കും.