പത്തനാപുരം(കൊല്ലം): കൊവിഡ്  നിരീക്ഷണത്തിലിരിക്കെ ഐസൊലേഷന്‍ വാര്‍ഡില്‍ നിന്ന് തമിഴ്‌നാട് സ്വദേശി മുങ്ങിയത് പരിഭ്രാന്തി പരത്തി. രണ്ടര മണിക്കൂര്‍ നീണ്ട അന്വേഷണത്തിനൊടുവില്‍ ഇയാളെ തിരികെ ആശുപത്രിയിലെത്തിച്ച് നിരീക്ഷണത്തിലാക്കി. തമിഴ്‌നാട് തിരുനെല്‍വേലി സ്വദേശിയായ തങ്കം (40)ആണ് ചാടിപ്പോയത്. 

പത്തനാപുരം ജനതാ ആശുപത്രിയില്‍  ഐസൊലേഷനില്‍ കഴിയവെയാണ് സംഭവം. പനിയും ചുമയും ഉണ്ടായതിനെ തുടര്‍ന്ന് പത്തനാപുരം താലൂക്ക് ആശുപത്രിയില്‍ ഇയാള്‍ ചികിത്സ തേടിയിരുന്നു.  ആദ്യ പരിശോധനാ ഫലം നെഗറ്റീവായിരുന്നു. വിദഗ്ധ പരിശോധനയ്ക്ക് വേണ്ടി വീണ്ടും രക്ത സാമ്പിള്‍  അയക്കുകയും ഇയാളെ ജനതാ ആശുപത്രിയില്‍ ഐസൊലേഷനില്‍ പ്രവേശിപ്പിക്കുകയുമായിരുന്നു. 

ഇന്നലെ രാവിലെ ആഹാരം കഴിച്ച് കൈ കഴുകാന്‍ പോയ ശേഷമാണ് കാണാതായത്.  സംഭവമറിഞ്ഞ് സ്ഥലത്തെത്തിയ പൊലിസും നാട്ടുകാരും ചേര്‍ന്ന് പ്രദേശമാകെ തിരിച്ചില്‍ നടത്തി. ഉച്ചയ്ക്ക് രണ്ടോടെ കലഞ്ഞൂര്‍ കുടപ്പാറയ്ക്ക് സമീപത്തെ കനാല്‍ പുറമ്പോക്കില്‍ ക്ഷീണിച്ച് അവശനിലയില്‍ തങ്കത്തെ കണ്ടെത്തുകയായിരുന്നു. വാഴപ്പാറ കനാല്‍  വഴി പാലമലയിലെ വീട്ടിലേക്ക് നീന്തി രക്ഷപ്പെടാന്‍ ശ്രമിക്കുന്നതിനിടെ ക്ഷീണിച്ച് കരയില്‍ കയറുകയായിരുന്നുവെന്ന് തങ്കം പൊലിസിനോട് പറഞ്ഞു. 

കൊട്ടാരക്കരയില്‍ നിന്ന്  പ്രത്യേകം അംബുലന്‍സ് എത്തിച്ച് തങ്കത്തെ വീണ്ടും ഐസൊലേഷന്‍ വാര്‍ഡിലേക്ക് മാറ്റി. പത്തനാപുരം പൊലിസ് കേസെടുത്തു.