കുന്നംകുളം : സ്വകാര്യബസുകളുടെ മുന്‍ഡോറില്‍ തൂങ്ങിയാടിയിരുന്ന കിളികള്‍ അപ്രത്യക്ഷമാകുന്നു.
പ്രതിദിനമുണ്ടാകുന്ന ഡീസല്‍ ചിലവുള്‍പടെയുള്ള ചിലവുകള്‍ താങ്ങാനാകാത്തതിനാല്‍ ഈ തസ്തിക അവസാനിപ്പിക്കാന്‍ ബസുമകള്‍ തീരുമാനിച്ചു.സംസ്ഥാന വ്യാപകമായ ക്ലീനര്‍ തസ്തിക നിര്‍ത്തലാകുമ്പോള്‍ തൊഴില്‍ നഷ്ടപെടുന്നതു ഒരു ലക്ഷത്തിലേറെ ആളുകള്‍ക്കാണ്.
നിയമപരമായി ക്ലീനര്‍ എന്ന തസ്തിക ബസ് സര്‍വിസിലില്ല. എങ്കിലും കാലങ്ങളായി സ്വകാര്യ ബസുകളുടെ മുന്‍ വാതില്‍ നിയന്ത്രിച്ചിരുന്നതു കിളികളായിരുന്നു.
ഓടുന്ന ബസിലേക്കു കിളികളേപോലെ പറന്നു കയറുകയും വിദ്യാര്‍ഥികളുള്‍പടേയുള്ള യാത്രക്കാരുമായി പലപ്പോഴും തര്‍ക്കത്തിലേര്‍പെടുകയും ചെയ്തിരുന്ന കിളികളെ ആര്‍ക്കും പെട്ടെന്നു മറക്കാനാകില്ല.
സംസ്ഥാനത്താകമാനം ഒരു ലക്ഷത്തിലേറെ പേര്‍ സ്വകാര്യ ബസുകളുടെ മുന്‍വാതിലില്‍ പറന്നിറങ്ങി ഉപജീവനം നടത്തിയിരുന്നു എന്നതാണു വസ്തുത.
എന്നാല്‍ ഡീസലിനു 75 ഉം ടാക്‌സ് , ഇന്‍ഷുറന്‍സ്, പെര്‍മിറ്റ്, അറ്റകുറ്റപണികള്‍ എന്നിവക്കു പോലും പണം തികയാതെ നെട്ടോട്ടമോടുന്ന വ്യവസായത്തെ നിലനിര്‍ത്താന്‍ സാധ്യമായ സാധ്യതകളിലേക്കുള്ള അന്വേഷണമാണു മുന്‍വാതിലിലെ സുരക്ഷ ജീവനക്കാരെ വേണ്ടെന്നു വെക്കാന്‍ കാരണമായത്.
ഇതിലൂടെ പ്രതി ദിനം 750 രൂപയെങ്കിലും മിച്ചം വെക്കാനാകമെന്നാണു ബസുടമകള്‍ പറയുന്നത്. ഓരോ മാസവും സര്‍വിസ് നടത്തുന്ന ബസുകളുടെ എണ്ണം കുറഞ്ഞു വരികയാണ്. ഡീസല്‍ വര്‍ധനവ് 70 കടന്നതോടെ ദിവസ ചിലവിനു പോലും പണം കണ്ടെത്താന്‍ സര്‍വിസില്‍ നിന്നു സാധിക്കുന്നില്ലെന്നു ബസുടമകള്‍ പറയുന്നു.എല്ലാ ചിലവുകള്‍ക്കും പുറമേ പ്രതിമാസം പതിനായിരം രൂപയെങ്കിലും ശരാശരി പിഴ ഇനത്തില്‍ പൊലിസിനടക്കണം.
അമിത വേഗത, വണ്‍വേ തെറ്റിക്കല്‍, യാത്രക്കാരുമായുള്ള കശപിശ, വിദ്യാര്‍ഥികളുമായുള്ള തര്‍ക്കം തുടങ്ങി യാത്രക്കാരുടേയോ ജീവനക്കാരുടേയോ, പ്രശ്‌നം ആരുടേതാണെങ്കിലും പിഴ അടക്കേണ്ടതു ഉടമകള്‍ തന്നെയാണ്.
അതുകൊണ്ടു തന്നെ സംസ്ഥാനത്തെ ഗതാഗത സംവിധാനം എന്ന നിലയില്‍ ഇതു നിലനിര്‍ത്താനുള്ള തത്രപാടിലാണു ഉടമകള്‍.
ബസ് ഓടിയാല്‍ ചിലവിനു പോലും കാശില്ലെന്ന അവസ്ഥയുണ്ടായതിനാലാണു തങ്ങളെ പിരിച്ചുവിടുന്നതെന്നു ക്ലീനര്‍മാരും പറയുന്നുണ്ട്.