ബാഗ്ദാദ്: ഇറാഖ് തലസ്ഥാനമായ ബാഗ്ദാദില്‍ ഇന്നലെ രാത്രിയിലുണ്ടായ ഇരട്ട ബോംബ് സ്‌ഫോടനത്തില്‍ 82 മരണം. 200ലധികം പേര്‍ക്ക് പരുക്കേറ്റു. നഗരത്തിലെ തിരക്കേറിയ വ്യാപാര മേഖലയിലാണ് ആക്രമണം ഉണ്ടായത്. അക്രമത്തിന്റെ ഉത്തരവാദിത്വം ഐ.എസ് ഏറ്റെടുത്തു.

റമദാന്‍ തിരക്കിലായിരുന്ന വ്യാപാരകേന്ദ്രത്തിലേക്ക് സ്‌ഫോടക വസ്തുക്കള്‍ നിറച്ച ട്രക്ക് ഓടിച്ചു കയറ്റി സ്‌ഫോടനം നടത്തുകയായിരുന്നു. സ്‌ഫോടനത്തെതുടര്‍ന്ന് സമീപത്തെ കടകളില്‍ ഭൂരിഭാഗവും കത്തിനശിച്ചിട്ടുണ്ട്.

ബഗ്ദാദിലെ കരദ ജില്ലയിലാണ് ആദ്യ സ്‌ഫോടനമുണ്ടായത്. പിന്നീട് കിഴക്കന്‍ ബാഗ്ദാദിലും സ്‌ഫോടനമുണ്ടായി. രണ്ടാമത്തെ സ്‌ഫോടനം ചാവേറാക്രമണമാണെന്ന് സംശയിക്കുന്നു.