കരുനാഗപ്പള്ളി: പൊലിസിനെ തെറ്റിദ്ധരിപ്പിച്ച സംഭവത്തില്‍ പരാതിക്കാരന്‍ അറസ്റ്റില്‍. അയണിവേലി കുളങ്ങര പീടികമുക്കിനു സമീപം വയല്‍ ഇറക്കത്ത് വീട്ടില്‍ മാത്തുകുട്ടി (56) യെയാണ് പൊലിസ് അറസ്റ്റ് ചെയ്തത്.
കഴിഞ്ഞ ദിവസം ഇയാളുടെ വീട്ടില്‍ നാലംഗ അക്രമിസംഘം എത്തി 10 ഗ്രാം സ്വര്‍ണ മോതിരവും വിലമതിക്കുന്ന പാത്രങ്ങളും കവര്‍ച്ച ചെയ്തുവെന്ന് കാണിച്ച് മാത്തുകുട്ടി പൊലിസില്‍ പരാതി നല്‍കിയിരുന്നു. ഇതിനെ തുടര്‍ന്ന് പൊലിസ് നടത്തിയ അന്വേഷണത്തില്‍ പരാതി വ്യാജമാണെന്ന നിഗമനത്തില്‍ എത്തിച്ചേര്‍ന്നു.
തുടര്‍ന്ന് ഇയാളെ പൊലിസ് കസ്റ്റഡിയിലെടുത്ത് ചോദ്യം ചെയ്തപ്പോള്‍ യഥാര്‍ഥ വിവരം പുറത്തുവരികയായിരുന്നു. പരാതിയില്‍ പറയുന്ന സാധനങ്ങള്‍ ഇയാള്‍ തന്നെ വില്‍ക്കുകയായിരുന്നുവെന്ന് പൊലിസ് പറഞ്ഞു. ഇയാളുടെ ഭാര്യ ഗള്‍ഫില്‍ നിന്നു നാട്ടില്‍ വരാന്‍ പോകുകയാണെന്നും ഇവര്‍ വരുമ്പോള്‍ സാധനങ്ങള്‍ കളവുപോയെന്ന് വരുത്തിത്തീര്‍ക്കാനുള്ള ശ്രമമായിരുന്നു നടത്തിയതെന്നും പൊലിസ് പറഞ്ഞു. കരുനാഗപ്പള്ളി എ.സി.പി വിനോദിന്റെ നിര്‍ദേശപ്രകാരം എസ്.ഐ ജ്യോതിഷ് സുധാകരന്‍ നടത്തിയ അന്വേഷണത്തിലാണു പരാതിക്കാരന്‍ പിടിയിലായത് .