കോവളം: മദ്യപിച്ചു ലക്കു കേട്ട് വാഹനം ഓടിച്ച പൊലിസുകാരനെ നാട്ടുകാര്‍ പിടികൂടി കോവളം
പൊലിസിന് കൈമാറി. വാഴമുട്ടം സ്വദേശിയും പേരൂര്‍ക്കട എസ്.എ.പി ക്യാമ്പിലെ ഡ്രൈവറുമായ അനില്‍ കുമാറിനെയാണ് കോവളം പൊലിസ് കസ്റ്റഡിയില്‍ എടുത്തത്.
ഞായറാഴ്ച രാത്രി 8 മണിയോടെ കോവളം ജങ്ഷന് സമീപമാണ് സംഭവം. വെള്ളാറില്‍ വെച്ച് അനില്‍കുമാര്‍ ഓടിച്ചിരുന്ന അംബാസിഡര്‍ കാര്‍ ബൈക്ക് ഉള്‍പ്പടെ ചില വാഹനങ്ങളില്‍ തട്ടി നിറുത്താതെ പോയി.
തുടര്‍ന്ന് അപകടത്തില്‍പ്പെട്ട ബൈക് യാത്രികന്‍ കാറിനെ പിന്തുടര്‍ന്ന് കോവളം ജങ്ഷനില്‍ തടഞ്ഞു നിറുത്തുകയായിരുന്നു. അമിത വേഗത്തില്‍ അപകടകരമായ രീതിയില്‍ വന്ന കാര്‍ നില്‍ക്കുന്നത് കണ്ട് നാട്ടുകാരും സ്ഥലത്ത് തടിച്ചു കൂടി.
എന്നാല്‍ മദ്യപിച്ച് ലക്കു കേട്ട അനില്‍ താന്‍ എസ്.ഐ ആണെന്നും മറ്റും പറഞ്ഞു നാട്ടുകാരെ വിരട്ടുകയും അസഭ്യം പറയുകയും ചെയ്തു. നാട്ടുകാര്‍ അനിലിനെ കയ്യേറ്റം ചെയ്യും എന്ന അവസ്ഥ എത്തിയപ്പോള്‍ വിവരം അറിഞ്ഞു കോവളംപൊലിസ് സ്ഥലത്തെത്തി ഇയാളെ കസ്റ്റഡിയില്‍ എടുക്കുകയായിരുന്നു.
സ്റ്റേഷനില്‍ എത്തിച്ച അനില്‍ കുമാര്‍ അക്രമാസക്തനായതിനെ തുടര്‍ന്ന് നിയന്ത്രിക്കാന്‍ പൊലീസുകാര്‍ നന്നേ ബുദ്ധിമുട്ടി.
ഇയാള്‍ക്കെതിരെ മദ്യപിച്ചു വാഹനം ഓടിക്കല്‍ തുടങ്ങിയ വകുപ്പുകള്‍
പ്രകാരം കേസ് എടുക്കുമെന്നും വാഹനം കോടതിയില്‍ ഹാജരാക്കുമെന്നും കോവളം എസ്.ഐ ശശിധരന്‍ പിള്ള അറിയിച്ചു