മുംബൈ: ലോക്ക്ഡൗണില്‍ കുടുങ്ങിയ ഒരു ലക്ഷത്തിലേറെ അതിഥി തൊഴിലാളികള്‍ക്ക് നാട്ടിലേക്ക് മടങ്ങാന്‍ മഹാരാഷ്ട്ര സര്‍ക്കാര്‍ അനുമതി നല്‍കി. മഹാരാഷ്ട്ര റവന്യൂ വകുപ്പും സംസ്ഥാന ദുരന്ത നിവാരണ അതോറിറ്റിയും ചേര്‍ന്നാണ് ഇതുസംബന്ധിച്ച തീരുമാനമെടുത്തത്. ആവശ്യമായ മെഡിക്കല്‍ പരിശോധനകള്‍ക്ക് ശേഷം അതിഥി തൊഴിലാളികള്‍ക്ക് നാട്ടിലേക്ക് മടങ്ങാമെന്ന് മഹാരാഷ്ട്ര സാമൂഹ്യ നീതി വകുപ്പ് മന്ത്രി ധനഞ്ജയ് മുണ്ടെയാണ് വ്യക്തമാക്കിയത്.പഞ്ചസാര ഫാക്ടറികളില്‍ ജോലി ചെയ്യുന്നവര്‍ക്കാണ് നാടുകളിലേക്ക് മടങ്ങാന്‍ അനുമതി നല്‍കിയത്. ഇവരുടെ യാത്ര, ഭക്ഷണം തുടങ്ങി എല്ലാ ചെലവുകളും ഫാക്ടറി ഉടമകള്‍ വഹിക്കണം.
ധനഞ്ജയ് മുണ്ടെയുടെ ഓഫിസ് പുറത്തിറക്കിയ പ്രസ്താവന പ്രകാരം 38 കരിമ്പ് ഫാക്ടറികളുടെ സമീപം ഒരുക്കിയ താല്‍ക്കാലിക ഷെല്‍ട്ടറുകളില്‍ 1.31 ലക്ഷത്തിലേറെ അതിഥി തൊഴിലാളികളാണ് കഴിയുന്നത്. നിരവധി ആളുകള്‍ മറ്റിടങ്ങളിലും കുടുങ്ങിക്കിടക്കുന്നുണ്ട്. ഈ സാഹചര്യത്തിലാണ് സര്‍ക്കാര്‍ വിഷയത്തില്‍ ഇടപെട്ടത്.നാടുകളില്‍ തിരിച്ചെത്തിയാല്‍ വീട്ടില്‍ത്തന്നെ നിരീക്ഷണത്തില്‍ കഴിയണമെന്നും മുണ്ടെ തൊഴിലാളികളോട് ആവശ്യപ്പെട്ടിട്ടുണ്ട്. തിരിച്ചു പോകാന്‍ അനുമതി നല്‍കിയ വിവരം പങ്കുവെച്ചുള്ള ട്വീറ്റിലാണ് അദ്ദേഹം ഇക്കാര്യം പറഞ്ഞത്. വീട്ടിലേക്ക് മടങ്ങുക. നിങ്ങളുടെ ആരോഗ്യത്തെയെന്നപോലെ ഗ്രാമത്തിലുള്ളവരെയും ശ്രദ്ധിക്കുക' അദ്ദേഹം ട്വീറ്റ് ചെയ്തു.