മുക്കം: കാരശ്ശേരി പഞ്ചായത്തിലെ കാരശ്ശേരി, കക്കാട് പ്രദേശങ്ങളെ ബന്ധിപ്പിക്കുന്ന ചീപ്പാന്‍കുഴി പാലം യാത്രക്കാര്‍ക്ക് അപകടക്കെണിയാകുന്നു. ഇടുങ്ങിയ റോഡ് ആയത് കാരണം അപകടങ്ങള്‍ സംഭവിക്കുന്നത് ഇവിടെ പതിവായിരിക്കുകയാണ് ഇപ്പോള്‍. ഇന്നലെ ഇവിടെ അപകടത്തില്‍പെട്ട ഒരു ലോറി തലനാരിഴക്കാണ് ആഴമുള്ള തോട്ടിലേക്ക് മറിയാതെ കല്ലിലും കൈവരിയിലുമായി തങ്ങിനിന്നത്.
കുറച്ചു ദിവസങ്ങള്‍ക്ക് മുന്‍പ് ഒരു കാറും ഇതേ രൂപത്തില്‍ അപകടത്തില്‍പെട്ടിരുന്നു. അന്നും വാഹനം കൈവരിയില്‍ തടഞ്ഞുനിന്നതിനാല്‍ വന്‍ ദുരന്തം ഒഴിവായി. നോര്‍ത്ത് കാരശ്ശേരി-ചെറുവാടി റോഡ് (എന്‍.എം ഹുസൈന്‍ ഹാജി റോഡ്) കഴിഞ്ഞ സര്‍ക്കാരിന്റെ കാലത്ത് പൊതുമരാമത്ത് വകുപ്പ് ഏറ്റെടുത്ത് പുനരുദ്ധരിച്ചപ്പോള്‍ റോഡ് വീതികൂട്ടിയിരുന്നു.
എന്നാല്‍ പാലം വീതികൂട്ടാതെ പഴയ രൂപത്തില്‍ തന്നെ നിലനില്‍ക്കുകയാണ്. വീതി കൂടിയ റോഡില്‍നിന്ന് വീതി കുറഞ്ഞ പാലത്തിലേക്ക് പെട്ടെന്ന് പ്രവേശിക്കുമ്പോള്‍ അപരിചിതരുടെ വാഹനങ്ങള്‍ തോട്ടിലേക്ക് മറിയുന്ന സാഹചര്യമാണ് ഇപ്പോഴുള്ളത്. ഇതാണ് ഭൂരിഭാഗം അപകടങ്ങള്‍ക്കും കാരണം.
റോഡിന് അനുസൃതമായി പാലവും വീതി കൂട്ടിയാല്‍ മാത്രമേ അപകടത്തിന് പരിഹാരം ആകുകയുള്ളൂ. രാത്രിയാണ് കൂടുതല്‍ അപകടങ്ങളും നടക്കുന്നത്. പാലം ഏറെ പഴക്കമുള്ളതിനാല്‍ പാലം പുനര്‍നിര്‍മിച്ച് അപകടം ഒഴിവാക്കണമെന്നാണ് നാട്ടുകാരുടെ ആവശ്യം.