തിരുവനന്തപുരം: വി.എസ്.അച്യുതാനന്ദനെതിരേ പരമോന്നത നീതിപീഠത്തില്‍ നിന്നുണ്ടാകുന്ന കനത്ത തിരിച്ചടികള്‍ ഇനിയെങ്കിലും അദ്ദേഹത്തിന്റെ കണ്ണുതുറപ്പിക്കണമെന്നു മുന്‍മുഖ്യമന്ത്രി ഉമ്മന്‍ചാണ്ടി.
കോടതിയെ ഉപയോഗിച്ച് നിരപരാധികളെ വേട്ടയാടുന്ന പൊതുപ്രവര്‍ത്തനം അദ്ദേഹം നിര്‍ത്തണം. രാഷ്ട്രീയവൈരത്തിന്റെ പേരില്‍ കോടതിയുടെ വിലപ്പെട്ട സമയം പാഴാക്കരുതെന്ന് പറഞ്ഞാണ് ഐസ്‌ക്രീം പാര്‍ലര്‍ കേസില്‍ സുപ്രിംകോടതി വി.എസിനെ നിശിതമായി വിമര്‍ശിച്ചത്. നേരത്തെ പാമോയില്‍ കേസില്‍ രാഷ്ട്രീയലാഭത്തിനു വേണ്ടി കോടതിയെ ഉപയോഗിച്ചാല്‍ പിഴ ഈടാക്കും എന്നുവരെ സുപ്രിംകോടതി മുന്നറിയിപ്പു നല്‍കിയതാണ്. അന്നു കണ്ണുതുറന്നിരുന്നെങ്കില്‍ ഇന്നു കോടതിയില്‍ നിന്ന് ഇത്രയും വലിയ പ്രഹരം ലഭിക്കില്ലായിരുന്നെന്ന് ഉമ്മന്‍ചാണ്ടി ചൂണ്ടിക്കാട്ടി. 20 വര്‍ഷം നീണ്ട ഐസ്‌ക്രീം പാര്‍ലര്‍ കേസ് മാറിമാറി വന്ന സര്‍ക്കാരുകള്‍ അന്വേഷിച്ചതാണ്. ഹൈക്കോടതിയുടെ മേല്‍നോട്ടത്തില്‍വരെ അന്വേഷണം നടന്നു. ഹൈക്കോടതിയും സുപ്രിംകോടതിയും കേസ് തള്ളുകയും കുഞ്ഞാലിക്കുട്ടിക്ക് അനുകൂലമായി വിധിക്കുകയും ചെയ്തു. 20 വര്‍ഷം കുഞ്ഞാലിക്കുട്ടിയെ വേട്ടയാടിയിട്ടും പോരാഞ്ഞിട്ടാണ് വീണ്ടും സുപ്രിംകോടതിയെ സമീപിച്ചതെന്നും ഉമ്മന്‍ചാണ്ടി പറഞ്ഞു.