കണ്ണൂര്‍: പുതിയതെരു ടൗണിലെ ജ്വല്ലറിയുടെ ചുമര്‍ തുരന്ന് കവര്‍ച്ചാശ്രമം. ദേശീയപാതയോരത്ത് സ്ഥിതിചെയ്യുന്ന അല്‍മാസ് ജ്വല്ലറിയിലാണ് ഇന്നലെ പുലര്‍ച്ചെ കവര്‍ച്ചാ ശ്രമമുണ്ടായത്. പിറകുവശത്തെ ചുമര്‍തുരന്ന് അകത്തുകടക്കാനായിരുന്നു മോഷ്ടാക്കളുടെ ശ്രമം. ചുമരു തുരന്നതിനുശേഷം അകത്തുണ്ടായിരുന്ന അലമാര മാറ്റാന്‍ കഴിയാതായതോടെ മോഷ്ടാക്കള്‍ പിന്‍മാറുകയായിരുന്നു. അലമാരയില്‍ തട്ടിയുണ്ടായ ശബ്ദത്തോടെ ഉടമയുടെ ഫോണില്‍ സന്ദേശം എത്തുകയും ചെയ്തിരുന്നു. തുടര്‍ന്ന് ഉടമ കൊല്ലറത്തിക്കല്‍പള്ളിക്കു സമീപത്തെ ഉസ്മാന്‍ഹാജി വളപട്ടണം പൊലിസില്‍ വിവരം നല്‍കുകി. പൊലിസും കണ്ണൂരില്‍ നിന്നുള്ള വിരലടയാള വിദഗ്ധരും സംഭവസ്ഥലത്തെത്തി പരിശോധിച്ചു. ചുമരിന്റെ നാല് കല്ലുകള്‍ മാറ്റിയിട്ടുണ്ട്. മോഷ്ടാക്കളുടേതെന്ന് സംശയിക്കുന്ന സി.സി.ടി.വി ദൃശ്യം പൊലിസിനു ലഭിച്ചിട്ടുണ്ട്.