മുംബൈ: ധാക്കയിലെ റസ്റ്റോറന്റില്‍ ഭീകരാക്രമണം നടത്തിയ തീവ്രവാദികള്‍ ഇന്ത്യന്‍ ഇസ്‌ലാമിക പണ്ഡിതന്‍ ഡോ. സാക്കിര്‍ നായിക്കിനെയും ഉദ്ധരിച്ചതായി വാര്‍ത്ത.

ബംഗ്ലാദേശ് ഭരണകക്ഷിയായ അവാമിലീഗ് പാര്‍ട്ടിയുടെ നേതാവിന്റെ മകനും ഏറ്റുമുട്ടലില്‍ കൊല്ലപ്പെട്ട ഭീകരനുമായ രോഹന്‍ ഇംതിയാസ് സാക്കിര്‍ നായിക്കിനെ ഉദ്ധരിച്ച് ഫേസ്ബുക്കിലൂടെ ഭീകരപ്രവര്‍ത്തനങ്ങള്‍ക്ക് ആഹ്വാനം ചെയ്തതായാണ് റിപ്പോര്‍ട്ടില്‍ പറയുന്നത്. ഇന്ത്യക്കാരനായ സാക്കിര്‍ നായിക്ക് ഇസ്‌ലാമിക പ്രബോധനരംഗത്ത് അന്താരാഷ്ട്രതലത്തില്‍ അറിയപ്പെടുന്ന പ്രാസംഗികനാണ്.
പീസ് ടി.വിയിലെ പരിപാടിയിലൂടെ ഇദ്ദേഹം ബംഗ്ലാദേശില്‍ പ്രശസ്തനാണ്. സാക്കിര്‍ നായിക്കിനെ കൂടാതെ ബ്രിട്ടനിലെ വിവാദ പണ്ഡിതന്‍ അന്‍ജും ചൗധരിയെയും ഇവര്‍ പിന്തുടര്‍ന്നതായി റിപ്പോര്‍ട്ടിലുണ്ട്. ഏറ്റുമുട്ടലില്‍ കൊല്ലപ്പെട്ട രോഹന്‍ ഇംതിയാസ്, നിബ്രാസ് ഇസ്‌ലാം എന്നിവരെ കുറിച്ചുള്ള വിവരങ്ങള്‍ ബംഗ്ലാദേശി ദിനപത്രമായ ദ ഡെയ്‌ലി സ്റ്റാറാണ് റിപ്പോര്‍ട്ട് ചെയ്തത്.