തിരുവനന്തപുരം: മുഖ്യമന്ത്രി പിണറായി വിജയന്റെ നേതൃത്വത്തില്‍ സംസ്ഥാന സര്‍ക്കാര്‍ ആയിരം ദിനങ്ങള്‍ പൂര്‍ത്തിയാക്കുന്നതിന്റെ സംസ്ഥാനതല ആഘോഷ പരിപാടികള്‍ക്ക് നാളെ സമാപനം.
തിരുവനന്തപുരം സെന്‍ട്രല്‍ സ്റ്റേഡിയത്തില്‍ വൈകിട്ട് 4.30 ന് നടക്കുന്ന സമാപന ചടങ്ങ് മുഖ്യമന്ത്രി പിണറായി വിജയന്‍ ഉദ്ഘാടനം ചെയ്യും.
റവന്യൂ മന്ത്രി ഇ. ചന്ദ്രശേഖരന്‍ അധ്യക്ഷത വഹിക്കും. ആയിരക്കണക്കിന് ആളുകളാണ് കഴിഞ്ഞ 19ന് ആരംഭിച്ച മേള സന്ദര്‍ശിക്കാനെത്തുന്നത്.
സര്‍ക്കാര്‍ അധികാരമേറ്റ് 1000 ദിവസങ്ങള്‍ക്കിടെ വിവിധ വകുപ്പുകള്‍ കൈവരിച്ച വികസന നേട്ടങ്ങളുടെ പ്രദര്‍ശനവും കരകൗശല ഉല്പന്നങ്ങളുടെ വിപണനവുമാണ് 120 ഓളം സ്റ്റാളുകളിലായി സജ്ജീകരിച്ചിരിക്കുന്നത്. നവകേരള നിര്‍മിതിക്കായി സര്‍ക്കാര്‍ നടപ്പാക്കുന്ന ഹരിതകേരളം, പൊതുവിദ്യാഭ്യാസ സംരക്ഷണ യജ്ഞം, ലൈഫ്, ആര്‍ദ്രം എന്നീ മിഷനുകള്‍ ആധാരമാക്കിയും 'നവോത്ഥാനം' എന്നീ വിഷയത്തിലും സെമിനാറുകളും സംഘടിപ്പിച്ചു. നാളെ (ഫെബ്രുവരി 27) വൈകിട്ട് നടക്കുന്ന സമാപന സമ്മേളനത്തില്‍ സാംസ്‌കാരിക വകുപ്പിന്റെ വജ്രജൂബിലി ഫെലോഷിപ്പ് പദ്ധതിയുടെ സംസ്ഥാനതല ഉദ്ഘാടനം മുഖ്യമന്ത്രി നിര്‍വഹിക്കും. മന്ത്രിമാരായ കെ. കൃഷ്ണന്‍കുട്ടി, എ.കെ. ശശീന്ദ്രന്‍, രാമചന്ദ്രന്‍ കടന്നപ്പള്ളി, എ.കെ. ബാലന്‍, എ.സി. മൊയ്തീന്‍, കടകംപള്ളി സുരേന്ദ്രന്‍ ചടങ്ങില്‍ സന്നിഹിതരാകും. സമാപന സമ്മേളനത്തിനു മുന്നോടിയായി വൈകിട്ട് 3.30 മുതല്‍ പുഷ്പവതിയും സംഘവും അവതരിപ്പിക്കുന്ന ദ്രാവിഡ ബാന്‍ഡ് അരങ്ങേറും.