ചാലക്കുടി: വാല്‍പ്പാറയില്‍ പുലിയുടെ ആക്രമണത്തില്‍ തോട്ടം തൊഴിലാളിയായ സ്ത്രീ മരിച്ചു. കാഞ്ചമല എസ്റ്റേറ്റില്‍ മതിയുടെ ഭാര്യ കൈലാസവതി(48)യാണ് അതിദാരുണമായി മരിച്ചത്.പുലിയുടെ ആക്രമണത്തില്‍ പരുക്കേറ്റ മാധവിയെ ആശുപത്രിയില്‍ പ്രവേശിപ്പിച്ചു.
തേയില തോട്ടത്തില്‍ പതുങ്ങിയിരുന്ന പുലി കൈലാസവതിയുടെ മേല്‍ ചാടി വീഴുകയായിരുന്നു. വീടിന് പുറകില്‍ തുണി കഴുകികൊണ്ടിരിക്കുമ്പോഴാണ് അപ്രതീക്ഷിതമായി ആക്രമണമുണ്ടായത്. കഴുത്തിന് കടിച്ചു വനത്തിലേക്ക് മറയുന്ന പുലിയെയാണ് ബഹളം കേട്ടെത്തിയ നാട്ടുകാര്‍ കണ്ടത്. ടോര്‍ച്ചും വടികളുമായി നാട്ടുകാര്‍ നടത്തിയ തിരച്ചിലില്‍ 200 മീറ്ററോളം അകലെ കൈലാസവതിയുടെ മൃതദേഹം കണ്ടെത്തുകയായിരുന്നു. സംഭവത്തില്‍ പ്രതിഷേധിച്ച് തോട്ടം തൊഴിലാളികളും നാട്ടുകാരും പ്രതിഷേധവുമായി തെരുവിലിറങ്ങിയിരുന്നു. ഉന്നത പോലിസ് ഉദ്യോഗസ്ഥരെത്തി സമരക്കാരുമായി ചര്‍ച്ച നടത്തിയതിനെ തുടര്‍ന്നാണ് വൈകിട്ട് വരെ നീണ്ട സമരം അവസാനിപ്പിച്ചത്. നാട്ടുകാരുടെ ആവശ്യങ്ങള്‍ ഉടന്‍ നടപ്പിലാക്കുമെന്ന് സ്ഥലം എം.എല്‍.എയും ഉന്നത പൊലിസ് ഉദ്യോഗസ്ഥരും ഉറപ്പ് നല്കിയതോടെയാണ് കൈലാസവതിയുടെ മൃതദേഹം വീട്ടിലേക്ക് കൊണ്ടുപോയത്. ഒന്നിന് സിങ്കോള എസ്റ്റേറ്റിലെ ചന്ദ്രമതി എന്ന തോട്ടം തൊഴിലാളിയെ പുലി ആക്രമിച്ചിരുന്നു. ഇവരിപ്പോഴും ചികിത്സയിലാണ്. കഴിഞ്ഞ പത്ത് വര്‍ഷത്തിനുള്ളില്‍ പതിനഞ്ചോളം പേരാണ് പുലിയുടെ ആക്രമണത്തില്‍ വിവിധയിടങ്ങളിലായി കൊല്ലപ്പെട്ടത്.