ന്യൂഡല്‍ഹി: ലോക്ക് ഡൗണ്‍ മൂലം മാധ്യമപ്രവര്‍ത്തകരെ പിരിച്ചുവിട്ട മാധ്യമസ്ഥാപനങ്ങള്‍ക്കും കേന്ദ്രസര്‍ക്കാരിനും സുപ്രിംകോടതി നോട്ടിസ്. ഗൗരവമുള്ള വിഷയമാണ് കോടതിയുടെ മുന്നിലെത്തിയിരിക്കുന്നതെന്നും സാഹചര്യം ഇങ്ങനെ തുടര്‍ന്നാല്‍ എത്രകാലം ആളുകള്‍ക്ക് ജോലിയില്ലാതെ പിടിച്ചു നില്‍ക്കാന്‍ കഴിയുമെന്നും കോടതി ചോദിച്ചു. സമാനമായ പ്രശ്‌നങ്ങള്‍ മറ്റ് ചില സംഘടനകളും ഉന്നയിച്ചിട്ടുണ്ടെന്നും കോടതി പറഞ്ഞു. രണ്ടാഴ്ച്ചക്കുള്ളില്‍ നോട്ടിസിന് മറുപടി നല്‍കണമെന്ന് കോടതി വ്യക്തമാക്കിയിട്ടുണ്ട്.
ലോക്ക് ഡൗണിന്റെ മറവില്‍ മാധ്യമസ്ഥാപനങ്ങള്‍ ജീവനക്കാരെ പിരിച്ചുവിടുകയും ശമ്പളം വെട്ടിക്കുറക്കുകയും ചെയ്യുന്നതിനെതിരേ നാഷണല്‍ അലൈന്‍സ് ഓഫ് ജേര്‍ണലിസ്റ്റ്, ഡല്‍ഹി യൂണിയന്‍ ഓഫ് ജേര്‍ണലിസ്റ്റ് എന്നീ സംഘടനകള്‍ ചേര്‍ന്നാണ് സുപ്രിംകോടതിയെ സമീപിച്ചത്.പത്രപ്രവര്‍ത്തകരെ പിരിച്ചുവിടുന്ന നടപടി വ്യാപകമായി രാജ്യത്ത് തുടരുകയാണെന്ന് ഹരജിക്കാരുടെ അഭിഭാഷകന്‍ കോളിന്‍ ഗോണ്‍സാല്‍വസ് കോടതി മുന്‍പാകെ ചൂണ്ടിക്കാട്ടി. ലോക്ക് ഡൗണിന് പിന്നാലെ മാധ്യമസ്ഥാപനങ്ങള്‍ ജീവനക്കാരോട് നിയമവിരുദ്ധവും മനുഷ്യത്വവിരുദ്ധവുമായാണ് പെരുമാറിക്കൊണ്ടിരിക്കുന്നതെന്നും കോളിന്‍ ഗോണ്‍സാല്‍വസ് പറഞ്ഞു. കേസില്‍ നോട്ടിസ് പുറപ്പെടുവിക്കാവുന്നതാണെന്ന് അഭിപ്രായപ്പെട്ട സോളിസിറ്റര്‍ ജനറല്‍ തുഷാര്‍ മേത്ത നോട്ടിസിന്റെ കോപ്പി നല്‍കണമെന്നും ആവശ്യപ്പെട്ടു. ജസ്റ്റിസുമാരായ എന്‍.വി രമണ, എസ്.കെ കൗള്‍, ബി.ആര്‍ ഗവായ് എന്നിവരടങ്ങിയ ബെഞ്ചാണ് ഹരജി പരിഗണിക്കുന്നത്.
ലോക്ക് ഡൗണിലും പ്രവര്‍ത്തിക്കാന്‍ സര്‍ക്കാര്‍ അനുമതി നല്‍കിയിട്ടും മാധ്യമസ്ഥാപനങ്ങള്‍ ജീവനക്കാരെ പിരിച്ചു വിടുകയാണെന്ന് ഹരജിയില്‍ പറയുന്നു. ചില സ്ഥാപനങ്ങള്‍ ജീവനക്കാര്‍ക്ക് പിരിഞ്ഞു പോകാന്‍ നോട്ടിസ് നല്‍കി. മറ്റു ചില സ്ഥാപനങ്ങള്‍ ശമ്പളം വെട്ടിക്കുറക്കുന്നതായി അറിയിച്ചു.
ചില സ്ഥാപനങ്ങള്‍ ശമ്പളമില്ലാത്ത അവധിയെടുക്കാന്‍ നിര്‍ബന്ധിക്കുന്നു. മാധ്യമസ്ഥാപനങ്ങള്‍ ഏകപക്ഷീയമായി അടച്ചു പൂട്ടുന്നുണ്ട്. ഈ നടപടികളെല്ലാം റദ്ദാക്കി ഉത്തരവിടണം. ജീവനക്കാരുടെ ശമ്പളം വെട്ടിക്കുറക്കരുതെന്ന സര്‍ക്കാര്‍ നിര്‍ദേശം അവഗണിക്കുകയാണ് ചില മാധ്യമങ്ങള്‍ ചെയ്യുന്നത്. മാധ്യമസ്ഥാപനങ്ങള്‍ അടച്ചുപൂട്ടുന്നത് 1947ലെ ഇന്‍ഡസ്ട്രിയല്‍ ഡിസ്പ്യൂട്ട് നിയമത്തിന്റെ ലംഘനമാണെന്നും ഹരജി ചൂണ്ടിക്കാട്ടി.