കുട്ടനാട്: കുട്ടനാട്ടില്‍ വെള്ളപ്പൊക്കത്തിനു നേരിയ ശമനം. എന്നാല്‍ കൈനകരി, മുട്ടാര്‍, പുളിങ്കുന്ന് പഞ്ചായത്തുകളിലെ വിവിധ പ്രദേശങ്ങള്‍ ഇപ്പോഴും വെള്ളത്തിലാണ്. വെള്ളപ്പൊക്കക്കെടുതി രൂക്ഷമായ കുട്ടനാട് താലൂക്കിലെ വിവിധ പഞ്ചായത്തുകളിലായി 158 കഞ്ഞിവീഴ്ത്തല്‍ കേന്ദ്രങ്ങളാണ് തുറന്നത്. കൂടാതെ സൗജന്യ റേഷന്‍ വിതരണവും താലൂക്കില്‍ ആരംഭിച്ചിട്ടുണ്ട്.
കൈനകരി നാലാം വാര്‍ഡില്‍ പ്രദേശവാസികളായ ചിലരെ ഉള്‍പ്പെടുത്തുവാന്‍ വില്ലേജ് ഉദ്യോഗസ്ഥര്‍ തയ്യാറായില്ലെന്ന് നാട്ടുകാര്‍ ആരോപിക്കുന്നു. പുളിങ്കുന്ന്, കാവാലംതട്ടാശേരി, വൈശ്യംഭാഗം ജങ്കാര്‍ സര്‍വിസുകളും ആരംഭിച്ചിട്ടില്ല. എടത്വാമാമ്പുഴക്കരി റോഡില്‍ വിവിധ ഭാഗങ്ങളിലായി വെള്ളക്കെട്ടുണ്ട്.
മുട്ടാര്‍കിടങ്ങറ റോഡിലും വേഴപ്ര-എടത്വാ റോഡിലും ജലനിരപ്പില്‍ കുറവുണ്ടെങ്കിലും ചെറുവാഹനങ്ങളുടെ ഗതാഗതം സുഗമമായിട്ടില്ല. പള്ളിക്കൂട്ടമ്മപുളിങ്കുന്ന്, മങ്കൊമ്പ് ക്ഷേത്രം റോഡ് എന്നിവിടങ്ങളിലും വെള്ളമുണ്ട്. കൈനകരിയിലെ വിവിധ തുരുത്തുകളിലെ ജലനിരപ്പില്‍ കാര്യമായ കുറവുണ്ടായിട്ടില്ല. പകല്‍ സമയത്ത് ജലനിരപ്പ് കുറയുന്നുണ്ടെങ്കിലും രാത്രിയാകുന്നതോടെ വേലിയേറ്റത്തില്‍ ജലനിരപ്പ് ഉയരുന്നത് പ്രദേശവാസികളെ ദുരിതത്തിലാക്കുന്നുണ്ട്. മഴക്കാല പൂര്‍വ രോഗപ്രതിരോധ പ്രവര്‍ത്തനങ്ങള്‍ ആരംഭിക്കാത്തതിനാല്‍ വെള്ളമിറങ്ങുന്നതോടെ രോഗങ്ങള്‍ പകര്‍ന്നു പിടിക്കുമെന്ന ആശങ്കയുമുണ്ട്.